O Santiago Futsal busca a primeira vitoria do ano ante Jumilla FS

Segunda cita en tres días para os equipos da LNFS. Un caprichoso calendario dispuxo dobre xornada do Santiago Futsal como local no feudo compostelán. Tras a visita de Cartagena Plásticos Romeu do martes (2-3), mañá reciben a Bodegas Juan Gil Jumilla FS (Fontes do Sar, 20.45h) no primeiro partido da 2ª volta.

Santi Valladares analizou o sucedido no encontro do martes ante o equipo cartaxenero, no que os brancos cederon ante un rival directo a pesares de adiantarse no marcador na primeira parte “Desde o primeiro partido de Liga (contra Jumilla FS) estamos a arrastrar os mesmos erros; erros que nos mataron durante toda a primeira volta. Ante Cartagena FS estivemos moi ben os 12 primeiros minutos; dos mellores do equipo no que levamos de temporada, pero o equipo comezou a botarse atrás e en 50 segundos cometemos dous erros terribles de falta de experiencia. Na segunda parte tivemos ocasións para reducir e empatar, pero non tivemos fortuna, nin co xogo 5 que nos viña dando resultado”. Valladares engadiu que “Temos equipos para gañarlle a calquera pero non podemos cometer erros infantís, de falta de experiencia e experiencia. Temos que ser contundentes na toma de decisións.”

Ante eles mañá un Bodegas Juan Gil Jumilla FS que ocupa o último posto da táboa con 4 puntos, equipo que só logrou puntos ante Gran Canaria (2-2) e Levante UD DM (1-2). Valladares dixo da escuadra branquiazul “Son un equipo que, a estas alturas, van cometer todos os riscos para lograr puntuar. Aínda que van aí abaixo, excepto resultados puntuais, chegan aos minutos finais dos partidos con marcadores axustados. Saen a peito aberto e sabemos que o partido de mañá será moi complicado”. Ao que apuntou que os brancos terán que “ser máis sólidos e non ter páxaras ou momentos de desconexión”.

O técnico santiagués concluíu que “Se o partido ante Cartagena FS era importante, o de mañá antóllase vital. Gañar mañá significaría descolgarnos do último clasificado e tal e como está a liga, que ninguén deixa nada, é moi importante para a segunda volta”.

O xogador madrileño Pablo Mel, que tamén asistiu á rolda de prensa previa ao partido de mañá, tamén se pronunciou sobre os erros cometidos no partido ante Plásticos Romeros Cartagena “O partido saíulles perfecto. Agardaban aproveitar os nosos erros e foi o que fixeron. Co marcador ao noso favor 1-0 non fomos capaces de ler o partido, estamos tan afeitos e temos tan automatizado un guión, que non nos demos conta no momento de varialo. Outra vez volveunos castigar a primeira parte, os problemas e os erros que estamos a ter cometémolos nos primeiros 20 minutos.”

En canto ao partido de mañá, Mel explicou “Non podemos escatimar en esforzos nin perdoar as que teñamos. Mañá non podemos fallar. Estar listos e ter a experiencia suficiente para manexar o partido se nos poñemos por diante. A clave do noso equipo radica na defensa e cunha boa defensa, todo irá ben”. Ademais, Pablo sabe que “eles veñen aquí a sacar puntos como sexa, cun xogo táctico e anárquico moi perigoso. Será un partido moi igualado no que teremos que traballar de principio a fin”.

Outra información

O encontro de mañá entre Santiago Futsal e Bodegas Juan Gil Jumilla FS celebrarase no Fontes do Sar ás 20.45h. As portas abriranse sobre as 20h, do mesmo xeito que o despacho de billetes do pavillón.

O prezo das entradas será de 10€ adulto, 5€ xuvenil (13-17 anos) e 2€ infantil (4-13 anos). Os abonados accederán de maneira gratuíta ensinando o seu abono na porta de acceso ao pavillón.

No descanso realizarase o habitual sorteo de material deportivo do club, para o que se poderán mercar rifas polo prezo de 1€ no hall de entrada; e o xogo ‘Coidado do Xabaril’ patrocinado por Charcuterías Seco.