As oficinas SmartPeme da área de Vigo acollen en xaneiro preto de 20 obradoiros

As oficinas SmartPeme da área de Vigo, situadas nos concellos de Ponteareas, O Porriño e Vigo, acollerán durante todo o mes de xaneiro un total de dezaoito obradoiros ao abeiro do programa SmartPeme da Deputación de Pontevedra. SmartPeme ofértalles ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións de empresarias e empresarios e de mozas e mozos autónomos.

As quendas para o mes de xaneiro na oficina de Vigo son as seguintes: o martes 10, “Deseña sinxelamente imaxes abraiantes e profesionais”, seguido de “Comercializa os teus servizos a través das redes sociais”, o xoves 12. A seguinte semana desenvolveranse “Xestión da túa empresa: facturación e ferramentas integradas”, o luns 16, e “Fotografía e vídeo para establecementos de turismo”, o xoves 19. Despois, o mércores 25 terá lugar “A túa páxina web con WordPress (continuación)” e, para rematar, “Como utilizar Instagram para promover a túa empresa”, o martes 31. A oficina SmartPeme de Vigo, na sede da Deputación da cidade, atópase na rúa Oporto, 3.

A oficina de Ponteareas acollerá os seguintes obradoiros: o mércores 11 de xaneiro, “Unifica a xestión das túas redes sociais con Hootsuite”. O luns 16 será a quenda de “Desenvolve a túa propia estratexia de e-mail márketing”, que dará paso, o mércores 18, a “Rendibiliza o teu perfil profesional en redes sociais”. O martes 24 de xaneiro seguiralle “Fotografía con smartphone: PIXLR para Android e iOS”, o xoves 26 desenvolverase “Como mellorar a percepción da túa clientela cos teus e-mails” e, por último, o luns 30 terá lugar “Google Analytics: interpretación dos datos e tomas de decisións”. A oficina SmartPeme de Ponteareas, no Centro de Desenvolvemento Local, atópase en Lomba do Cruceiro, 5.

Por último, a oficina do Porriño acollerá os seguintes obradoiros: o martes 10 de xaneiro, “Promove o teu perfil en Facebook con aplicacións externas” e, dous días despois, o xoves 12, “Google Analytics: interpretación dos datos e tomas de decisións”. “Xestión da túa empresa: facturación e ferramentas integradas” desenvolverase o mércores 18 de xaneiro, ao que lle seguirá “Unifica a xestión das túas redes sociais con Hootsuite”, o venres 20. A seguinte semana, o mércores 25, desenvolverase “Emprego de vídeos nas redes sociais: YouTube, Periscope…”. A última quenda será a de “Fotografía e vídeo para establecementos de turismo”, o martes 31. A oficina SmartPeme do Porriño, no multicentro do Concello, atópase na rúa Ribeira, s/n.

Todas as actividades -tanto as de Ponteareas coma as do Porriño e as de Vigo- terán lugar ás 19:00 horas. A inscrición pódese facer a través do número de teléfono 886 202 020, do correo electrónico info.smartpeme@depo.es ou na páxina web www.smartpeme.depo.es.

Lembramos que o novo proxecto SmartPeme, en palabras da presidenta da Deputación, Carmela Silva, “é un novo modelo de servizo orientado á mellora competitiva das pemes e á procura dunha melloría nas vendas e na eficacia e eficiencia das tarefas, o que abre novos campos de actuación e alcanza novos grupos de interese, coma os emprendedores, as asociacións empresariais e os axentes de dinamización en concellos”. Para isto, nas oficinas de SmartPeme no Porriño, Cambados, Pontevedra, Lalín, Ponteareas e Vigo póñense en marcha as seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial das persoas asesoras en función das necesidades da súa área de influencia, kits de asesoramento en novas tecnoloxías a emprendedores e emprendedoras, identificación e difusión das necesidades TIC aos provedores de solucións para as pemes e, tamén, o impulso de novas carteiras de servizos de asesoramento.