publicidade hoxe

Ames acollerá unha nova edición das xornadas de comedores escolares

PUBLICADO EN: Noticias de GaliciaAmes
A-
A+

Os días 14 e 18 de febreiro o Concello de Ames situarase, por primeira vez, no centro do debate sobre o modelo de xestión dos comedores escolares de Galicia. A pedagoga Mar Romera, presidenta da Asociación Francesco Tonucci, presentará as xornadas o día 14 de febreiro, ás 20:00 horas, cunha conferencia sobre o proxecto educativo e a alimentación saudable no ensino público. O día 18 de febreiro, a partir das 10:00 horas, realizaranse diferentes encontros e mesas de debate sobre o modelo de xestión dos comedores escolares. Estas xornadas desenvolveranse no auditorio da Casa da Cultura de Bertamiráns.

No mes de maio de 2016 o concelleiro de Educación e Cultura, David Santomil, asistiu á I Xornada sobre comedores escolares, organizada pola Confederación de ANPAS galegas e a Federación de ANPAS da comarca de Compostela. A través desta iniciativa pretendeuse crear debate sobre o modelo de xestión dos comedores escolares de Galicia.

Santomil participou nunha mesa redonda para explicar o funcionamento da Rede municipal de comedores do Concello de Ames, que son un referente na calidade e na xestión directa a nivel estatal. Froito deste encontro, acordouse organizar as II Xornadas no Concello de Ames os días 14 e 18 de febreiro de 2017 no auditorio da Casa da Cultura de Bertamiráns.

As entidades organizadoras coinciden na importancia de realizar en Ames estas xornadas. O martes 14 de febreiro, ás 20:00 horas, a pedagoga Mar Romera presentará as xornadas cunha conferencia sobre o proxecto educativo e a alimentación saudable nas escolas.

Debate sobre o modelo de xestión dos comedores

O sábado 18 de febreiro, no mesmo auditorio, e dende as 10:00 horas realizaranse diferentes mesas de debate sobre o modelo de xestión  dos comedores escolares a través de empresas de catering, dos concellos, da Xunta de Galicia e das ANPAS, así como das iniciativas máis destacadas neste ámbito. Aproveitarase esta sesión matinal para facer públicos os resultados dun estudio da enquisa feito entre as familias compostelás realizada pola Federación de ANPAS Compostela, a través da distribución de 2.760 cuestionarios nos que preguntaron ás familias polo modelo de xestión do servizo de comedores que prefiren nos centros públicos de Santiago de Compostela.

O proxecto educativo dos comedores escolares

Xa pola tarde, o primeiro bloque centrarase nos produtos ecolóxicos e de proximidade, onde están convidadas empresas e proxectos que desenvolven ditas actividades. De seguido, diferentes empresas concesionarias do funcionamento dos programas de conciliación de Ames e o Colexio de Educadoras e Educadores sociais de Galicia abordarán o proxecto educativo dos comedores escolares, dando a coñecer as primeiras polo miúdo o traballo que se está a realizar nos centros públicos de Ames. Finalmente pechárase estas xornadas co módulo Dieta Atlántica e Deporte.

Estas xornadas están deseñadas para todos os públicos, desde usuarios/as de comedores escolares, docentes, persoal dos comedores escolares, comunidade educativa e ANPAS en xeral, e tamén para diferentes empresas provedoras locais e hostalería. Máis información, programa e inscricións en anpascompostela@gmail.com ou en www.anpasgalegas.org

25 de xaneiro de 2017 | 17:43 • Sen comentarios

Comentarios pechados.