Aberto o prazo de inscrición para participar no programa de conciliación Entroido Lúdico

Por segundo ano consecutivo o Concello de Ames pon en marcha o programa de conciliación Entroido Lúdico. O prazo de inscrición estará aberto ata este venres 13 de xaneiro. O servizo desenvolverase os días 27 e 28 de febreiro, así como o 1 de marzo, no mesmo horario e coa mesma modalidade coa que se veñen impartindo os demais programas lúdicos.

O concelleiro de Educación e Cultura, David Santomil, destaca que “despois da boa experiencia da anterior edición decidimos repetir de cara a finais do mes de febreiro e comezos de marzo o programa do Entroido Lúdico. Agardamos que se consolide no tempo como un programa máis dos lúdicos, xa que existen moitos pais e nais que por esas datas necesitan deste servizo para poder conciliar a súa vida laboral e familiar”.

A inscrición pódese realizar nos rexistros do Concello: no departamento de Educación, situado no Pazo da Peregrina de Bertamiráns, ou na Oficina Municipal do Milladoiro. Para obter máis información pódese chamar ao número de teléfono 981 891 476 ou enviar un correo electrónico ao enderezo educacion@concellodeames.gal.

O Entroido Lúdico terá lugar os días 27 e 28 de febreiro, así como o 1 de marzo, e desenvolverase no CEIP da Maía, en Bertamiráns, e no EEI do Milladoiro. Este programa de conciliación únese así aos xa ofertados de xeito regular ao longo do ano: o Nadal Lúdico, que rematou o pasado 5 de xaneiro, a Primavera Lúdica, o Xuño Lúdico e mailo Setembro Lúdico, que se suman a outras iniciativas de conciliación como a Escola de Verán.

Esta iniciativa parte do Concello para facilitar á poboación amesá, composta por numerosas familias con nenos e nenas pequenos aos que se dirixen estes programas e que non cesan de medrar, a compatibilidade da vida laboral co coidado dos máis pequenos. Estes programas (os lúdicos e a Escola de Verán) están dirixidos aos nenos e nenas escolarizados no 2º ciclo de Educación Infantil e en Educación Primaria.