A Fundación Celta presenta en Serbia o seu campus de fútbol

Presentación do campus

Esta mañá presentouse oficialmente a primeira edición do campus de fútbol da Fundación Celta de Vigo na República de Serbia. A cidade de Veliko Gradišche, situada ás beiras do río Danubio acollerá unha nova experiencia internacional da entidade celeste destinada a mozos deportistas entre 4 e 15 anos e estará apadriñada por Nemaja Radoja, xogador do RC Celta e Milorad Ratkovic, ex xogador celeste e membro da secretaría técnica do club. A actividade levará o nome de “Campus de Fútbol Celta de Vigo – Veliko Gradiste”.

O campus, que se desenvolverá entre o 6 e o 11 de febreiro, naceu froito do acordo asinado entre a Fundación Celta de Vigo, o concello de Veliko Gradišche e o principal club de fútbol da cidade serbia, o FK VGSK. Nace ademais coa firme vontade de establecerse como unha actividade periódica para os mozos locais así como unha oportunidade para desenvolver as súas aptitudes futbolísticas de man dos preparadores das categorías inferiores do RC Celta.

Na presentación estiveron presentes o alcalde da cidade serbia Dragan Milić, o presidente do FK VGSK, Nenad Stojanović e Milorad Ratkovic como padriño da actividade. 

Tras a apertura da escola de fútbol en Brasov, Romanía, a Fundación Celta de Vigo continúa desenvolvendo actividades no leste de Europa co obxectivo de fortalecer a súa presenza internacional e promover a filosofía e metodoloxía de traballo da canteira celeste.