Os ausados de participar nunha operación ficticia de tráfico de drogas négano e alegan relacións empresariais

Os acusados de participar nunha operación ficticia de tráfico de drogas que rematou nun intento de asasinato da persoa que presuntamente ía comprar as substancias negaron formar parte dunha banda criminal, tal e como lles acusa a Fiscalía, e algúns deles puntualizaron que se coñecían porque mantiñan relacións empresariais.

A Sección Primeira da Audiencia Provincial da Coruña acolleu este luns a primeira sesión do xuízo contra sete homes -un deles xa falecido- acusados de integración en grupo criminal, roubo e asasinato en grao de tentativa, e tenza ilícita de armas, entre outros delitos. A Fiscalía pide penas de entre dez anos e nove meses de prisión e os 26 anos e medio.

Así, sinala que, en data indeterminada, pero en todo caso dende polo menos o mes de setembro do ano 2014, os acusados P.P.H., M.C.R., B.B.R., R.M.A., M.M.F. e A.V.P. concertaban en Galicia supostas operacións de venda de substancias estupefacientes “co propósito de obter de xeito indebido cantidades importantes de diñeiro que tiñan no seu poder os presuntos compradores”.

Ademais, indica que, nos primeiros días do mes de decembro de 2014, o acusado P.P.H. contactó telefonicamente co tamén acusado BR.F.S. con quen o primeiro, co propósito de obter un beneficio patrimonial ilícito, conveu unha ficticia operación de venda de substancia estupefaciente que se desenvolvería nos días sucesivos.

Tras unha primeira visita, realizada en data 3 de decembro de 2014 ao domicilio do acusado B.R.F.S., en Muxía (A Coruña), conveuse entre todos os intervinientes os termos da ficticia operación. Non obstante, nun posterior encontro, produciuse un enfrontamento con armas entre algúns dos procesados. Como consecuencia da acción anterior o acusado B.R.F. sufriu tres perforacións intestinais.

“NON É VERDADE”

Ante o tribunal, todos eles negaron formar parte dunha organización criminal. “Non é verdade” ou “é totalmente incerto” foron algunhas das expresións que dirixiron os acusados ao representante do Ministerio Público cando se lles cuestionaba sobre a súa participación nos feitos.

M.C.R. explicou que mantiña relacións empresariais con P.P.H. polos negocios de ocio que rexentaban ambos os dous , pero negou calquera vínculo máis alá da mera relación de negocios.

“É totalmente mentira”, respondeu este acusado ao ser preguntado pola súa relación cos feitos que este luns lle levaron a sentar no banco dos acusados.

Ao igual que o primeiro dos acusados en declarar, o resto tamén mantivo as mesma postura: negando formar parte dunha banda criminal.

Ademais, varios deles aseguraron que non seguían as “directrices” dos presuntos líderes. “Ningún me daba directoras”, afirmou un dos procesados. O xuízo prolongarase ata este mércores.