O secretario dos empresarios de Lugo cre que Antonio Fontenla “non sería mal candidato” para volver presidir a patronal

O secretario xeral en funcións da Confederación de Empresarios de Galicia, o lucense Jaime López, afirmou que o que foi presidente da patronal galega, Antonio Fontenla, á fronte actualmente dos empresarios da Coruña, “non sería un mal candidato” para volver a liderar a CEG.

Designado este mércores secretario xeral da CEG de xeito provisional, o á súa vez secretario xeral dos empresarios de Lugo destacou que “se”vai buscar unha figura de consenso”.

“Cando falamos de consenso falamos de que sexa un candidato avalado por todas as organizacións para demostrar unha imaxe de unidade e de sensatez que é o que demandan os empresarios galegos de nós”, sentenciou.

Ao respecto de que concorra Fontenla, apelou a que “é unha decisión persoal”, aínda que, persoalmente, opinou que “o seu labor á fronte da organización está máis que acreditada e non sería un mal candidato”.

Segundo afirmou, asume o seu cargo provisional na patronal galega “con moita responsabilidade”, e aclarou que o seu papel “nisto é arbitrar un proceso que se axuste a todas as normas e á legalidade dentro dos estatutos da Confederación de Empresarios de Galicia”.

As eleccións convocaranse a próxima semana, en torno ao día 7 -cando se cumpren dous meses da dimisión do anterior responsable, Antonio Dieter Moure-, polo que, de acordo co que avanzou Fontenla este mércores -como presidente en funcións, ten a potestade de convocar os comicios-, a cita coas urnas volverá producirse a mediados de xaneiro -ao haber un prazo mínimo de 40 días para que se fixe a asemblea-.