Jorge Duarte, investigado por prevaricación no caso das sancións a locais de ocio, non dimitirá

O concelleiro de Espazos Ciudadanos do Concello de Santiago, Jorge Duarte (Compostela Aberta), foi citado a declarar o próximo 15 de febreiro en calidade de investigado -a figura que substitúe á imputación- por un suposto delito de prevaricación por trato de favor ou trato desigual a locais de ocio da capital galega.

Confirmouno el mesmo nunha rolda de prensa convocada de urxencia na Casa do concello compostelano apenas dúas horas despois de recibir a citación por parte da Fiscalía, na que compareceu el só ante os medios de comunicación.

“Dende o primeiro momento quixen ser transparente co caso, por iso estou aquí nada máis recibir o auto (de citación por parte de Fiscalía), intentando dar conta da información e ser claro e transparente”, resaltou Duarte, quen tamén indicou que pedirá un adianto na data da súa declaración para “aclarar o tema canto antes”.

Se ben deixou claro que non pensa dimitir, toda vez que ten “a conciencia moi tranquila”, si avanzou que formulou o alcalde, Martiño Noriega, que analice a posibilidade de traspasar a outro concelleiro as súas competencias en Licenzas e Disciplina Urbanística.

“É importante garantir á cidadanía a maior confianza”, xustificou, para explicar que o seu movemento busca “que o proceso non afecte ao funcionamento do servizo”. Ademais, aseverou que aínda non recibiu resposta do rexedor, quen, precisamente, declinou atender os xornalistas en relación a este asunto ata o venres.

NON DIMITIRÁ

Preguntado sobre se pensou deixar o cargo, Jorge Duarte sostivo que “non” tanto porque ten “a conciencia moi tranquila” como porque á súa situación non se enmarca en ningún dos supostos que marca o código ético de Compostela Aberta.

En concreto, no punto 3.7, este documento impón a obriga de dimitir ante “a imputación” por “delitos relacionados con corrupción, prevaricación con ánimo de lucro, tráfico de influencias, enriquecemento inxusto con fondos públicos ou privados, suborno, malversación e apropiación de fondos públicos, ben sexa por interese propio ou para favorecer terceiras persoas”.

“Fálase de prevaricación por motivos económicos (no código ético) e este caso é por trato desigual entre uns locais e outros”, argumentou, non sen reivindicar que “sempre” pensou que “todo o que se fixo estaba plenamente xustificado”.

DILIXENCIAS ABERTAS

O caso arrancou o pasado mes de setembro, cando Fiscalía decidiu abrir dilixencias para descubrir se Jorge Duarte cometera trato de favor con algúns establecementos de ocio nocturno da cidade a raíz dunha denuncia.

O Ministerio Público persegue, polo tanto, esclarecer se certos locais non chegaron a ser multados -por exceso de auditorio ou de ruído e por incumprimento do horario de peche, entre outros aspectos- por unha actuación arbitraria do edil.

Cando transcendeu a noticia, Duarte asegurou que o concello estaba a cumprir a normativa de sancións e peche. En cambio, un grupo de bares e pubs protestou por, precisamente, un “rigor excesivo” á hora de facer cumprir as ordenanzas.