Dous homes detidos por roubo con violencia ao subtraer o bolso a unha muller mediante un tirón en Ourense

Axentes da Policía Nacional e a Policía Local detiveron en Ourense a dous homes como presuntos autores dun roubo con violencia cometido na rúa Remedios da cidade das Burgas ao subtraer o bolso a unha muller mediante o método do tirón cando estaba sentada nunha terraza.

Segundo informou a Comisaría de Ourense, os feitos que motivaron a detención sucederon o xoves 8 de decembro sobre as 00,10 horas, cando a Policía Local foi requirida por unha señora que manifesta ser vítima dun roubo con violencia por parte de dous homes.

Os individuos, tras tirarlle de “forma brusca” polo bolso que levaba debaixo do brazo esquerdo, segundo o relato policial, propínanlle un forte empuxón, conseguindo finalmente arrebatarllo”. Posteriormente, emprenderon a fuxida nun turismo de cor escura que se atopaba estacionada preto do lugar do feito.

Unha dotación da Policía Local procedeu a realizar unha busca pola zona do vehículo que foi localizado nas inmediacións do Barrio de Covadonga. Así, requiriron a colaboración da Brigada de Seguridade Cidadá da Comisaría Provincial de Ourense.

Ambos os dous corpos de seguridade procederon a realizar unha vixilancia discreta sobre o devandito vehículo e detiveron dous individuos sobre as 2,20 horas cando se dispoñían a entrar neste. Unha vez realizada unha inspección ocular no interior do vehículo observáronse diversos efectos, como móbil e efectos persoais os cales posteriormente foron recoñecidos pola denunciante como da súa propiedade.

Os detidos son un home de 31 anos, natural de Ourense, ao que lle consta un arresto anterior, e un home de 29 anos, sen antecedentes. Pasaron a disposición xudicial na mañá deste venres.