Abel Caballero non descarta mobilizacións despois de que Fomento “deixe a Vigo sen AVE”

O alcalde de Vigo, Abel Caballero, anunciou este martes que iniciará unha rolda de contactos con axentes sociais e económicos da cidade, para “facelos coñecedores de que Vigo queda de novo sen AVE”, tras constatar a “absoluta falta de interese” do novo ministro de Fomento, Íñigo de la Serna, para levar adiante o proxecto.

O rexedor olívico trasladou, en rolda de prensa, a súa “inmensa preocupación” e “alarma total” ao coñecer as declaracións do titular de Fomento ao respecto da conexión ferroviaria por alta velocidade entre Galicia e a Meseta, e recordou que a variante de Cerdedo “leva cinco anos coa súa tramitación paralizada” e co informe de impacto ambiental sen concluír.

“Nos últimos cinco anos estivéronse a rir da cidade, estivéronnos a tomar o pelo”, denunciou, e advertiu de que a alta velocidade ferroviaria é un proxecto “estratéxico e fundamental” para o desenvolvemento da cidade e, polo tanto, “irrenunciable”.

“Ante ese insulto e a falta de compromiso, vou iniciar unha rolda de contactos con toda a cidade”, sinalou Caballero, quen avanzou que eses contactos culminarán coa convocatoria do consello Social da cidade para que este órgano se pronuncie de forma unánime e esixa ao Goberno de España “que acelere a declaración de impacto ambiental” da variante de Cerdedo e o proxecto de AVE directo entre Vigo, Ourense e Madrid.

A preguntas dos medios sobre se convocará unha manifestación (como xa fixo para opoñerse á fusión das caixas ou para apoiar o aeroporto de Peinador), Abel Caballero afirmou: “Non descarto nada, porque estar nas redes de alta velocidade europeas é un obxectivo irrenunciable”.