Un xulgado declara nula por abusiva unha cláusula de Vodafone sobre desbloqueo de terminais

O Xulgado do Mercantil número 1 da Coruña declarou nula por abusiva unha cláusula de Vodafone relativa ao desbloqueo de terminais, tras admitir a demanda interposta polo Ministerio Fiscal, Adicae e diferentes particulares contra a empresa de telefonía móbil polas cantidades cobradas.

No seu fallo, segundo informou o Tribunal Superior de Xustiza de Galicia (TSXG), o xuíz considera nula a condición xeral concretada no punto 8 dos contratos, no que prevé o cobramento dunha cantidade ao cliente por liberalizar os terminais móbiles.

“En definitiva, unha vez finalizado o período de permanencia, ou con anterioridade, se se aboou a cláusula penal ou se están a cumprir as obrigas derivadas do contrato, o cliente debe ter a posibilidade de utilizar libremente o terminal”, indica.

A sentenza explica tamén que o fallo ha de aplicarse a todos os clientes que celebraran ou vaian asinar contratos nos que a demandada preste servizos de telefonía móbil, aínda que non foran parte no proceso. Ademais, condénase a Vodafone a devolver as cantidades cobradas, incluídos os impostos.

POSIBLE MULTA

O xuíz acorda así mesmo que se imporá unha multa coercitiva a Vodafone de 5.000 euros por cada día que transcorra, a partir dos dous meses seguintes á data da firmeza da sentenza, en caso de que a empresa non cesara no uso das condicións xerais declaradas nulas.

Á demanda colectiva do Ministerio fiscal, “exercitando accións de cesación, devolución de cantidades cobradas pola demandada e indemnización por danos e prexuízos” puideron sumarse tanto asociacións como particulares de todo o territorio nacional.

CLIENTES DE AIRTEL

A Fiscalía sostivo, na súa demanda, que Vodafone impuxo unha limitación técnica aos teléfonos móbiles facilitados aos seus clientes “que impide utilizalos con outras compañías operadoras e restrinxe a posibilidade de destinalos a outros fins”.

Tamén recordaba que a empresa “absorbeu á empresa de telefonía Airtel” e que, en consecuencia, se subrogou na posición que ostentaba esta con respecto aos seus clientes “e tamén cobrou indebidamente cantidades por liberalizar teléfonos móbiles que procedían de contratos subscritos por clientes de Airtel”.