Ourense contará cun centro público de atención a persoas minusválidas de máis de 21 anos

O conselleiro de Política Social, José Manuel Rey Varela, comprometeu este mércores no pleno do Parlamento que Ourense terá un centro de atención a persoas con diversidade funcional (CAPD) de máis de 21 anos e que será “público”.

Este mércores a plataforma Pro CAPD de Ourense concentrouse ante o Parlamento galego para reclamar que o PP cumpra a promesa feita en campaña electoral de construción dun centro destas características, xa que a partir desa idade as persoas minusválidas non poden seguir no de formación de Miño, en Velle, e denuncian que non existe outro en Ourense que os poida atender.

Ao respecto, a deputada socialista Noela Blanco formulou unha pregunta ao Goberno galego tras constatar as familias, con “sorpresa” e “indignación”, despois das eleccións que “o proxecto non era o que se prometera”.

En resposta, Rey Varela garantiu que haberá un CAPD na provincia de Ourense, a única na que non existe en Galicia, ao tempo que recordou que a última reunión coas familias foi o 27 de outubro, e tras ela se procedeu a dar conta aos técnicos das “modificacións oportunas” no proxecto. Ademais, haberá proximamente outro encontro para pechar os aspectos desta iniciativa.

Sobre esta cuestión, Noela Blanco remarcou que os pais e nais destas persoas con minusvalidez “levan moito tempo loitando” e foron capaces de recoller 50.000 sinaturas en tan só 15 días en demanda deste centro. “Pídolle que non lles falle, confían na súa palabra, cumpra a súa palabra”, avisou Rey Varela.

Ademais, Rey Varela apuntou que na provincia de Ourense había 168 prazas de atención pública a persoas con minusvalidez intelectual e ao rematar o ano haberá 202. Na actualidade, hai 14 persoas en lista de espera na provincia, o que “quedará solucionado” coa posta en marcha dese centro.