O Concello de Santiago cualifica de “inaceptable” a deportación dun veciño

O alcalde de Santiago de Compostela, Martiño Noriega, cualificou de “absolutamente inaceptable” a deportación dun veciño de Santiago de orixe paraguaia que residía na capital galega dende os 5 anos e que, unha vez cumprida a maioría de idade, non conseguiu regularizar a súa situación ao non ter contrato de traballo.

Así, Noriega expresou a súa repulsa pola expulsión do país dun “veciño de Santiago que ten que ser tratado como tal”, xa que “se criou aquí dende os 5 anos, o irmán dos cales naceu aquí e a súa nai vive aquí”.

En relación a isto, o rexedor compostelano indicou que o mozo foi “escolarizado na cidade” e tamén “se acolleu a programas de menores da Xunta e programas socioeducativos do Concello”, polo que entende como “inaceptable o sucedido”.

“Dá a sensación de que, ás veces, moito falamos das intencións de Trump pero logo aplicamos o mesmo modus operandi para facer operacións que escapan do sentido común”, espetou Noriega.

DEPORTADO EN MENOS DUNHA SEMANA

Esta fin de semana, un novo de 19 anos de orixe paraguaia que residía en Santiago de Compostela dende os 5 anos foi deportado a Paraguai logo de que, unha vez cumprida a maioría de idade, non atopase un traballo que lle permitise regularizar a súa situación.

O Foro Galego de Inmigración denunciou o caso e confirmou o pasado domingo que o mozo, que foi detido e trasladado a Madrid a comezos da semana pasada, xa se atopa no país latinoamericano.

Segundo esta entidade, este veciño de Santiago “non ten ningunha familia” en Paraguai, xa que a súa “nai e irmán pequeno (que naceu en Compostela) residen aquí dende hai 14 anos”, ao que hai que sumar que “a nai está enferma e soa e precisa coidados e atención”.