Dúas mozas feridas nun accidente de tráfico causado pola néboa en Sandiás

Dúas mozas resultaron feridas a primeira hora deste xoves nun accidente de tráfico rexistrado na localidade ourensana de Sandiás. A intensa néboa que cubría a zona dificultou a localización do vehículo tras recibir a chamada de alerta.

Segundo a información da Central de Atención a Emerxencias 112-Galicia, o suceso aconteceu pouco antes das 8,00 horas deste xoves nunha vía secundaria que vai cara á igrexa de Piñeira de Arcos.

Foi un familiar das vítimas o que alertou o 112 indicando que o vehículo se atopaba “perdido no medio da néboa” e que as mozas, bastante nerviosas tras o impacto, se atopaban no seu interior.

Ata o lugar do suceso desprazáronse os Bombeiros de Xinzo, axentes da Garda Civil de Tráfico e unha ambulancia do 061 que, tras localizar o vehículo, prestou asistencia sanitaria a ambas as dúas mozas.

ACCIDENTE EN COIRÓS

Por outra banda, efectivos de emerxencias liberaron a última hora deste mércores a unha persoa que sufriu un accidente de tráfico na localidade coruñesa de Coirós.

Segundo os datos do 112-Galicia, o sinistro aconteceu sobre as 20,00 horas no lugar de Oís, na estrada que une esta parroquia coa de Espenuca, onde o vehículo se saíu da estrada e envorcou.

No operativo participou un equipo dos Bombeiros de Betanzos, que tiveron que liberar o home, xa que quedara atrapado no vehículo. Así mesmo, tamén interveu unha ambulancia do 061.