Deteñen a un ourensano e unha brasileira por suposta falsidade documental

Membros da Policía Nacional detiveron un ourensano de 53 anos como presunto autor dun delito contra os dereitos dos traballadores estranxeiros, outro de bigamia e un terceiro de falsidade documental.

Tamén foi arrestada unha cidadá brasileira, de 36, por un delito de falsidade documental e infracción á lei de estranxeiría. Ambas as dúas detencións producíronse este luns sobre as 10,00 horas, segundo informa a Policía a través dun comunicado de prensa.

A investigación policial, segundo apunta, comezou o 20 de outubro do presente ano cando a Brigada Provincial de Estranxeiría e Fronteiras da Comisaría Provincial de Ourense, dentro das súas funcións de control da legalidade das vías de regularización dos estranxeiros no país, detectou a constitución como parella de feito dunha cidadá extracomunitaria cun español e o acceso dela a través desta vía ao réxime comunitario.

Como nestas unións se detectan bolsas de fraude na regularización, indica a Policía, en colaboración coa subdelegación de Gobierno de Ourense solicitou a tarxeta de familiar cidadán da Unión Europea da muller brasileira baseándose en ser parella de feito cun español. Ambos os dous acreditaban a súa solvencia nun traballo que non constaba de alta na Seguridade Social.

DUPLICIDADE DE REXISTROS

Continuando coas comprobacións pertinentes os axentes observaron como se produciu unha duplicidade de rexistros en dúas ocasións diferentes, toda vez que o veciño de Ourense detido contraeu matrimonio en primeiras nupcias cunha cidadá española e foi inscrito no rexistro civil territorial da cidade.

Aínda casado con ela, contraeu novamente matrimonio en Brasil coa cidadá brasileira, expulsada de España apenas seis meses antes. Esta nova inscrición realizouse no rexistro civil central, relativo ás inscricións de matrimonios realizados no estranxeiro.

“Beneficiándose da inexistencia de cruzamento de información entre ambos os dous rexistros”, revogouse así a prohibición de entrada que tiña a cidadá brasileira, xa que adquiriu a condición de residente de familiar comunitario e polo tanto a residencia legal en España.

En marzo do presente ano, segundo prosegue o relato da Policía, este español, divorciado da primeira esposa española, pediu inscribirse no rexistro de parellas de feito da Xunta con outra cidadá brasileira, pero sen achegar datos de divorcio da primeira, polo que se produciu unha nova duplicidade de rexistros – esta vez entre o rexistro civil central e o rexistro de parellas de feito – .

Acreditou de novo a solvencia económica desta nova parella cunha nómina falsa, posto que “non traballa nin traballou nunca”, segundo a Policía.

‘OPERACIÓN CONCHITA‘

Os detidos son un home de 53 anos, natural de Ourense, ao que lle constan dúas detencións anteriores, e unha muller de 36 de Nerópolis (Brasil) que carece de arrestos previos. Ambos os dous pasaron a disposición xudicial na tarde deste luns.

A ‘Operación Conchita’ destapou, deste xeito, a duplicidade de rexistros en dúas ocasións diferentes no rexistro civil central, o rexistro civil territorial e o rexistro de parellas de feito da Xunta.

“Esta trama permitiu que por medio de matrimonio cun español, dúas cidadás estranxeiras obtivesen fraudulentamente permiso de residencia como familiar de comunitario”, apunta a nota. Unha delas, fora expulsada de España e constáballe unha prohibición de entrada.