Afeccionados do Deportivo pedirán “xustiza para Jimmy” no segundo aniversario da súa morte

A federación de asociacións de afeccionados do Real Club Deportivo de La Coruña pedirá “xustiza para Jimmy” este mércores, no segundo aniversario da morte do siareiro Francisco Javier Romero nunha pelexa con radicais do Atlético de Madrid nas inmediacións do estadio Vicente Calderón.

“O mércores cúmprense dous anos do asasinato de Jimmy e os asasinos seguen libres, polo que pediremos xustiza para Jimmy,” destaca o colectivo a través da súa conta en Facebook.

En concreto, a federación convocou unha marcha cara á torre de Marathón que sairá ás 21,00 horas dende a praza de Portugal. Unha vez alí, realizarase unha ofrenda floral e darase lectura a un comunicado. Xa posteriormente, segundo apunta a federación de penas, proxectarase un vídeo na asociación ‘Jimmy sempre con nós’.

En maio de 2015, o maxistrado do Xulgado número 20 de Madrid deixou en liberdade os catro acusados da morte de ‘Jimmy’, decisión que ratificou despois a Audiencia.

Xa en xaneiro deste ano, o menor acusado de participar na morte do siareiro declarou no Xulgado de Menores número 4 da capital do estado despois de que dous membros da Fronte Atlética fosen detidos tras ameazalo.