A Xunta destaca que o Smart Commerce permite ao sector chegar a un maior número de potenciais clientes
A directora xeral de Comercio, Sol Vázquez Abeal, clausurou hoxe na Coruña unha xornada sobre tenda online, organizada na sede da Cámara de Comercio e na que destacou a importancia de impulsar o emprego das novas tecnoloxías para mellorar a competividade do comercio de proximidade, ao tempo que supón abrir novos mercados e oportunidades de negocio e chegar a un maior número de potenciais clientes.
Sol Vázquez puxo especial énfase no compromiso da Consellería de Economía, Emprego e Industria polo crecemento e consolidación do smart commerce. Baixo esta premisa, a Xunta busca favorecer o establecemento dun novo modelo de comercio intelixente no que, a través da innovación e as novas tecnoloxías, ten como principal característica que sitúa o cliente no centro da súa estratexia.
Durante a súa intervención no taller celebrado na Cámara de Comercio, Industria, Navegación e Servizos da Coruña, Sol Vázquez sinalou que o Plan estratéxico de impulso ao Comercio de Galicia inclúe entre os seus retos a necesidade de incrementar a innovación no sector para, deste xeito, mellorar a posición competitiva do comercio de proximidade.
A Consellería de Economía, Emprego e Industria, a través do programa para impulsar o smart commerce e o comercio en liña, concedeu este ano axudas por valor de 850.000 euros na provincia da Coruña, das que se beneficiaron preto de 270 comerciantes e artesáns.