A Praza do Obradoiro tínguese de loito en memoria das vítimas das violencias machistas

A compostelana Praza do Obradoiro tinguiuse de loito en memoria das vítimas das violencias machistas este venres 25 de novembro, Día Internacional pola eliminación da Violencia de Xénero.

Na mañá deste venres, a praza santiaguesa acolleu o acto central da campaña ‘En negro contra a violencia’, impulsada dende o Concello de Santiago e que se desenvolve paralelamente noutros 16 municipios galegos co obxectivo de “visibilizar e concienciar” acerca de a “lacra” das violencias machistas.

Centos de paraugas negros e brancos formaron o lema desta campaña nun acto que se iniciou cun minuto de silencio en memoria da última vítima da violencia de xénero, unha muller que foi asasinada pola súa parella o pasado xoves en Fuenlabrada (Madrid).

O acto contou coa presenza de representantes de todos os grupos municipais na Cámara compostelana, o reitor da USC, Juan Viaño, o deán da Catedral, Segundo Pérez, a valedora do Pobo, Milagros Otero, o voceiro parlamentario de En Marea, Luís Villares, e representantes do Exército e os corpos da Garda Civil, Policía e Protección Civil.

MANIFESTO

O alcalde de Santiago, Martiño Noriega, foi o encargado de ler un manifesto no que chamou a “seguir avanzando” na loita dende as institucións contra esta lacra e “non caer na falsa imaxe, porque sexa máis visible que anos atrás ou haxa un marco legal máis amplo, é suficiente”.

Así, incidiu no “preocupante e desalentador” que é a presenza desta realidade nas xeracións máis novas, ao tempo que chamou a que a loita contra a violencia machista sexa “unha prioridade política”.

TERMO “FEMINICIDIO”

Neste sentido, indicou que o Concello de Santiago proporá á Xunta que “avalíe a inclusión do termo feminicidio” na lexislación galega como “concepto estrutural que de conta da violencia específica que sofren as mulleres só por ser mulleres”.

Así mesmo, instou o Goberno galego a que elabore “un estatuto de vítima de feminicidio”, así como a que “continúe mellorando os servizos de atención, información e inserción laboral”.

Respecto á política municipal, o manifesto resalta que o Concello de Santiago se compromete a manter a violencia de xénero como “unha das prioridades na axenda política” e continuar levando a cabo “medidas de concienciación do conxunto da veciñanza, prevención e educación para a xente máis nova”.

“Dende o Concello de Santiago consideramos que é imprescindible unha resposta unánime e firme de todos os poderes públicos e da cidadanía no seu conxunto, que poña de manifesto o rexeitamento social de todas as formas de violencia contra as mulleres”, reza o texto lido por Noriega.