Un premio polos 30 anos de ‘Cineuropa’ será unha das novidades do concurso de tapas de Santiago

Un premio en homenaxe aos 30 anos do festival ‘Cineuropa’ será a principal novidade da novena edición do ‘Santiago(é)tapas’, o concurso de tapas da capital galega, que se celebrará este ano entre os días 17 de novembro e o 4 de decembro.

Esta mención especial, o ‘Santiago(é)Cine 2016’, será entregada á tapa que por título, técnica, produto ou elaboración estea vinculada ao mundo do cine.

O ‘Santiago(é)tapas’ foi presentado este luns en rolda de prensa pola concelleira de turismo, Marta Lois, e o vicepresidente primeiro da Asociación Hostalaría Compostela, Germán González.

Na súa quenda, González explicou que o prezo do petisco este ano sobe a 2,5 euros, e que no concurso participarán entre 60 e 70 establecementos -por agora están inscritos uns 40-.

Ademais, apuntou que “igual” en 2016 pódese chegar ás 40.000 tapas consumidas, tras as 31.000 do pasado exercicio, e 69 locais participantes. En conxunto, o concurso alcanza as 245.000 tapas vendidas, e espera desta forma situar o total en case 300.000.

REFERENTE

Estas cifras, a xuízo do representante dos hostaleiros e da edila de turismo, ratifican ao evento como referente e promotor da gastronomía local, así como dinamizador do consumo nun contexto desestacionalizado.

Na estrea da colaboración entre Turismo de Santiago e a Asociación Hostalaría Compostela, en 2015, decidiuse novembro como momento para o ‘Santiago(é)tapas’, para dotar á tempada baixa dun evento gastronómico potente.

Ademais, outra medida foi que as receitas das tapas inclúan polo menos un produto pertencente a algunha das denominacións de orixe ou indicacións xeográficas protexidas de Galicia.

‘TAPASPORTE’

Como é xa habitual, o público poderá percorrer os locais puntuando as tapas consumidas cos posavasos do concurso e recollendo selos de participación na súa ‘Tapasporte’, documento da súa peregrinación gastronómica.

Completar e validar cada ruta terá premio directo e completar e validar todo o ‘Tapasporte’, un premio especial. Tamén volverá haber un ‘Tapasporte Exprés’ para turistas.

GALARDÓNS

A votación popular será a responsable de decidir tres premios: o primeiro con 1.000 euros, o segundo con 500 en produtos Estrella Galicia e o ‘Premio (É)xcelente 2016’ para o local con mellor servizo integral.

O gañador do primeiro galardón, ademais, será o representante de Compostela no evento ‘De Tapas por Galicia’ ou calquera outro evento similar.

O xurado especializado fará o seu labor visitando de incógnito os establecementos e escollendo a proposta gañadora -que recibirá 1.500 euros-. Como novidade, este ano outorgará o ‘Santiago(é)Cine 2016’, en homenaxe aos 30 anos de “Cineuropa”.

Os establecementos de hostalaría teñen até o 29 de outubro para inscribirse na oficina técnica do concurso, na Praza do Toural, ou por correo electrónico. O ‘Santiago(é)Tapas’ conta co patrocinio de Cash Marca (Vegalsa) e Coca Cola, e a colaboración especial de Estrella Galicia-Cabreiroá.