Promoción dos produtos do mar e do agro de Galicia no Fórum Gastronómico de Barcelona

O director xeral de Pesca, Acuicultura e Innovación Tecnolóxica, Juan Maneiro, visitou hoxe o Fórum Gastronómico de Barcelona para apoiar ás empresas galegas do mundo do mar presentes neste certame no que as consellerías do Mar e do Medio Rural fan promoción os produtos do mar e do agro de Galicia.

Cada Consellería conta cun posto no que albergan un total de 12 empresas coexpositoras, seis en cada un dos espazos, pertencentes ao sector agroalimentario e ao eido da conserva de produtos do mar. No ámbito agroalimentario, a meirande parte das compañías representadas neste Fórum achegan doces e produtos propios das sobremesas como xeados, marmeladas ou crema de castañas, entre outros.

Ademais, a Consellería do Mar complementa a súa presenza con dous obradoiros realizados pola cociñeira Lucía Freitas. Un deles terá lugar esta tarde, ás 17:45 horas, e a el asistirá o director xeral de Pesca, Acuicultura e Innovación Tecnolóxica, Juan Maneiro.

Nel Lucía Freitas elaborará catro receitas con produtos procedentes da pesca artesanal e amparados polo selo pescadeRías. Presentará ceviche de vieira, polbo lacado con emulsións de queixo San Simón da Costa e pementos de Herbón; pinto en escabeche con crema de tubérculos e caldeirada cítrica e xurelo afumado con piquillos e colatura de anchoa. A outra demostración baixo o nome O mar en conserva tivo lugar onte e nela mostrou a versatilidade destes produtos e as súas posibilidades na cociña.

A maridaxe nos dous talleres está acompañada por Ramón do Casar 2015, da Denominación de Orixe Ribeiro, e Ladairo Colección de Familia, da Denominación de Orixe Monterrei, os mellores viños branco e tinto galegos escollidos nas ‘Catas de Galicia 2016’.

Fórum Gastronómico

O Fórum Gastronómico é un congreso con feira dedicado á gastronomía. Naceu no 1999 e conta con tres sedes: A Coruña, Girona e Barcelona. Nos seus 17 anos de traxectoria consolidouse como un encontro de referencia para o sector gastronómico. Este evento incentiva o contacto directo entre relatores, expositores e visitantes profesionais. A súa anterior edición en Barcelona, no ano 2014, contou con máis de 57.000 visitantes.