Enviar a un amigo
Opinar
ImprimirO PSOE local propón entrar no goberno da Coruña para garantir a estabilidade
O Grupo Municipal do PSOE no Concello da Coruña propuxo entrar a formar parte do goberno municipal, a través da fórmula dun “goberno de coalición” con Marea Atlántica, como “solución” para garantir a estabilidade.
En rolda de prensa, o voceiro socialista, José Manuel Dapena, sinalou esta fórmula como “a máis axeitada” para achegar estabilidade ao goberno municipal e “optimizar” a actual xestión levada a cabo pola Marea Atlántica.
Esta solución foi referendada por a Executiva do PSOE coruñés e así explicitalo a secretaria xeral, Mar Barcón, ao afirmar que “é necesario fortalecer o goberno para cumprir o compromiso de cambio de progreso que en 2015 votaron os coruñeses”.
Os socialistas consideran que a entrada no goberno garante estabilidade plenaria, permite axilizar a xestión e axuda a definir un proxecto de cidade.
“DESEÑANDO ÁREAS E ASUMINDO RESPONSABILIDADES”
A solución proposta polo PSOE prodúcese pola “parálise” da cidade e pola “necesidade de reforzar un goberno que non é capaz de levar a cabo o cambio que votaron os coruñeses”. “Non lle demos un cheque branco para que fixese o que quixese coa cidade”, di Barcón, para recordar así o apoio dos socialistas á investidura de Xulio Ferreiro como alcalde.
“O goberno formularíase deseñando áreas e asumindo responsabilidades”, dixo Barcón, que insiste en que os socialistas non demandan “nin números nin concellarías”.
Mar Barcón reiterou que o PSOE apoiou á Marea porque apoiaba o cambio e avalou a Marea nos presupostos, ordenanzas fiscais, modificativos e asuntos claves para a cidade, pero os resultados para a cidade non son os esperados e por iso o Partido Socialista propón entrar no goberno para “corresponsabilizarse” na xestión con traballo.
Na mesma liña, José Manuel Dapena indicou que “o momento é agora”, despois de ver que a cidade non avanza e con tempo abondo para “endereitar o rumbo”. “O tempo bótase enriba. Non hai meses nin semanas que perder”, advirte.
O PSOE, segundo recorda, mantense á espera da resposta de Xulio Ferreiro, aberto a seguir dialogando sobre o marco previo negociador e o documento entregado polos socialistas a Marea Atlántica o 2 de agosto cos acordos pendentes por cumprir por parte do goberno local.
