O Padroado do Ifevi acorda enviar a proposta de Conxemar á Xunta para a ampliación do recinto feiral e iniciar así a tramitación administrativa

Reunión do padroado de Ifevi

A directora xeral de Comercio, Sol Vázquez, asistiu hoxe á reunión do Padroado do Instituto Feiral de Vigo (Ifevi) na que se avaliou o proxecto presentado pola Asociación Española de Maioristas, Importadores, Transformadores e Exportadores de Produtos da Pesca e Acuicultura (Conxemar) para a ampliación do recinto vigués. No encontro tamén se acordou enviar esta proposta á Xunta para iniciar a tramitación do procedemento administrativo que é preciso para incrementar a superficie das instalacións en 5.000 metros cadrados.

Tras o récord de participación obtido este ano en Conxemar, con 583 expositores -un 7% máis que en 2015- procedentes de 43 países -cun incremento de preto do 20%-, e co obxectivo de dotar ao evento de maior capacidade, a reunión de hoxe do Padroado do Ifevi, presidido pola Consellería de Economía, Emprego e Industria, centrouse no plan para ampliar as instalacións de cara a próximas edicións. En concreto, o presidente de Conxemar, José Luis Freire, presentou ao Padroado a súa proposta para incrementar en 5.000 metros cadrados a superficie expositiva da actividade, que na edición deste ano alcanzou os 32.000 metros cadrados.

Despois de escoitar as necesidades do sector para consolidar o evento como unha das feiras de referencia de produtos do mar conxelados a nivel europeo e internacional e de avaliar o proxecto, o Padroado do Ifevi deu o visto bo tanto á proposta de Conxemar para ampliar o recinto como ao seu envío á Xunta para iniciar a tramitación administrativa do expediente, que se realizará mediante o procedemento recollido na Lei de medidas en materia de proxectos de urxencia ou de excepcional interese promovidos por administracións públicas.

A directora xeral de Comercio destacou que as obras de ampliación do recinto feiral beneficiarán ao conxunto do tecido económico empresarial tanto de Vigo como de Galicia, permitindo mellorar a competitividade das empresas do sector do peixe conxelado, ás que ofrecerá novas oportunidades de negocio durante a celebración de Conxemar, con expositores de máis países e coa presenza de máis produtos novos que se están a desenvolver. Ademais, ábrense novas oportunidades para o resto de feiras de Ifevi.

A Xunta asume o financiamento da obra, pero está aberta á participación do resto de administracións que se mostren interesadas no desenvolvemento deste proxecto estratéxico para Vigo e todas as empresas galegas do sector. De feito, para a execución do proxecto é precisa a participación do Concello de Vigo, tanto na tramitación do expediente como no proceso de expropiación dos terreos necesarios para levar adiante a ampliación do Ifevi.