O home achado inconsciente e cunha ferida na cabeza en Vigo ía ebrio e caeu

A Policía Nacional apuntou que o home de 49 anos de nacionalidade arxentina que foi achado na madrugada deste domingo en plena rúa do centro de Vigo en estado inconsciente e cunha ferida na cabeza, supostamente sufriu estas feridas ao caer cando se atopaba ebrio.

Tal e como informaron fontes da Policía Nacional, os feitos sucederon na noite do sábado ao domingo na rúa de Churruca, e a raíz do acontecido sospeitouse que o home puidese ser vítima dunha agresión, polo que se abriu unha investigación.

De feito, a Policía Local informou de que o 061 deu o aviso de que se producira unha agresión na vía pública, polo que unha patrulla se desprazou ata o lugar dos feitos, onde se atopou con ao home en estado inconsciente e sangrando pola cabeza.

Sobre este suceso, unha testemuña explicou aos axentes desprazados ao lugar que o varón fora empurrado por dous mozos, que logo abandonaran a zona. Non obstante, fontes da Policía Nacional descartaron que se tratase de agresores, senón de dúas persoas que supostamente trataron de auxilialo.

“NINGUÉN VIU NADA”

A presunta vítima tamén asegurou que o pegaran, se ben os profesionais do hospital non detectaron síntomas de violencia sobre el, aínda que si verificaron que sufría unha intoxicación etílica e lle deron dous puntos para pechar a brecha da cabeza.

As mesmas fontes apuntaron que no lugar dos feitos “ninguén viu nada” de violencia, senón que “viron caer” ao home, polo que, a expensas de que se tome declaración ás testemuñas que faltan para poder pechar a investigación, crese que non se produciu ningunha agresión senón que o home caeu.