Excarceran a unha persoa tras envorcar o vehículo que conducía en Pontevedra

Os bombeiros de Pontevedra excarceraron este mércores unha persoa que quedou atrapada no interior do vehículo que conducía, segundo informa o 112. Foron varios os particulares que, sobre as 9,20 horas, alertaron o 112, e indicaron que un vehículo acababa de envorcar en Monteporreiro, á altura do número 37 da rúa Italia. Aseguraron tamén que había xente atrapada no interior do vehículo.

Así, de inmediato, o 112 alertou a Urxencias Médicas e aos bombeiros da cidade que, tras chegar ao punto, confirmaron a excarceración do único ocupante do vehículo. O 112 tamén solicitou a colaboración dos axentes da Policía Local e dos efectivos de Protección Civil da localidade.