Comezan a declarar os dous peritos da aseguradora de Renfe

O xuíz Andrés Lago Louro, que instrúe a causa polo accidente do Alvia que ocasionou 80 mortos e máis de 100 feridos en xullo de 2013 en Angrois, comezou sobre as 9,30 horas a tomar declaración aos dous peritos de QBE, a aseguradora de Renfe.

Frans Heijnen e James Robert Catmur, que sosteñen que o risco na curva de A Grandeira non era tolerable, chegaron aos xulgados compostelanos sobre as 9,00 horas, cando estaban citados polo titular do Xulgado de Instrución número 3 de Santiago.

Á sede xudicial accederon tamén numerosos avogados, en representación da propia aseguradora, pero tamén de Adif -a avogada do Estado-, do maquinista -neste momento único imputado polo descarrilamento- e de vítimas do sinistro ferroviario.

Ás 11,00 horas está previsto que compareza o catedrático da Universidade de Cantabria Enrique Castillo Ron, que elaborou varios informes por encarga do perito xudicial Juan Carlos Carballeira, enxeñeiro de camiños, e que entende que o nivel de perigo na liña era razoable.

O RISCO NA CURVA

O risco que existía na curva de A Grandeira e se Adif, responsable de velar pola seguridade na vía, o analizou de forma adecuada para poder adoptar medidas que o mitigasen centran as comparecencias deste martes.

Consultados, tanto os afectados como a defensa do condutor destacaron que esperan que a xornada sexa relevante para o procedemento xudicial.

Unha investigación que dende hai máis de tres anos trata de esclarecer se ademais do despiste do condutor, que circulaba cun exceso de velocidade, hai outros responsables na traxedia.

E é que o descarrilamento do convoi se produciu nun punto da liña Ourense-Santiago no que, por cambios no proxecto inicial, non estaba implantado o ‘ERTMS’, instalado na rede de alta velocidade.

Tampouco estaba activo este sistema de control na súa modalidade embarcada, debido a que o ‘software’ xeraba fallos e os encargados da seguridade aprobaron a súa desconexión.