Cetmar presenta a experiencia do Observatorio Raia en Noruega, no Congreso Inmartech, e na Semana da Ciencia e da Tecnoloxía Mariña en Brest

O Centro Tecnolóxico do Mar participa estes días na décima edición da Semana da Ciencia e a Tecnoloxía Mariña (SeaTech Week 2016) que se celebra na cidade francesa de Brest. Faino na Conferencia ACO “Un océano conectado” que se desenvolve ao amparo desta iniciativa coa participación dos principais actores a nivel mundial.

A institución galega está presente nun taller coa industria no que se analizará a oportunidade que para o desenvolvemento da economía azul suporía o establecemento dun acceso aberto aos datos mariños a escala europea.

O taller está organizado conxuntamente por EuroGOOS e EMODnet coa colaboración de varios dos socios do proxecto COLUMBUS, iniciativa do programa H2020 na que CETMAR está a traballar da man de 26 entidades europeas para mellorar a transferencia dos resultados de investigación no ámbito mariño.

Observatorio oceanográfico

O Centro contribuíu nos últimos anos aos avances no acceso á información procedente do medio mariño. O establecemento de observatorios oceanográficos costeiros como o Observatorio transfronteirizo RAIA, xestionado conxuntamente con Meteogalicia e INTECMAR, contribuíron a achegar eses datos aos usuarios finais.

O obxectivo do taller no que participa o CETMAR é facilitar aínda máis o acceso a esa información e identificar claramente cales son as necesidades da industria neste sentido, especialmente das pequenas e medianas empresas, co fin de transformar esa información en innovación.

A experiencia acumulada tras oito anos de funcionamento da Rede de Observación Oceanográfica do Observatorio RAIA (www.marnaraia.org) presentouse tamén no Congreso INMARTECH que tivo lugar na localidade de Bergen, en Noruega, onde persoal da Unidade de Tecnoloxías Mariñas do CETMAR puxo de manifesto as vantaxes de abrir o acceso aos datos e as predicións mariñas.