Carmela Silva cre que as demandas de Villares tiran “por chan” o discurso

A presidenta da Deputación de Pontevedra, a socialista Carmela Silva, arremeteu este xoves contra En Marea e contra o seu voceiro, Luís Villares, tras coñecerse a petición dun secretario, chofer e unha compensación económica (dende que foi confirmado como candidato), e criticou que esas peticións deixan “polo chan” o discurso desta formación, porque “non tardou nin dous meses” en converterse “naquilo que denunciaba”.

A preguntas dos medios sobre esta cuestión, nun almorzo informativo celebrado en Vigo, Silva proclamou que “non se pode chamar ‘casta’ aos demais e, o primeiro día que chegan, se converter naquilo que cuestionaban”.

“Convertéronse naquilo que denunciaban, pero rapidito, non tardaron nin dous meses, foi dun día para outro. Iso está ben, porque a xente xa pode empezar a valorar a seriedade duns, e a falta de seriedade doutros”, proclamou.

“Mareas e Podemos chegaron dicindo que non querían asesores, nin coches, nin chofer… ían transformalo todo e, claro, non coñecían para nada a Administración. A súa formación política e a súa formación técnica deixan moito que desexar e cando chegaron atopáronse con que hai un procedemento administrativo”, engadiu.

Carmela Silva, quen subliñou que o voceiro do PSdeG na Cámara galega, “nunca tivo secretaria”, cualificou de “grave erro” a actuación de Villares, e o atribuíu á “absoluta inexperiencia política”.

“Nós, en lugar de facer grandes discursos que quedan en nada, dedicámonos a falar menos e traballar máis”, concluíu.

Nesa liña, a presidenta da Deputación de Pontevedra referiuse ao “difícil” que gobernar é e xestionar, e puxo como exemplo os gobernos das cidades da Coruña, Santiago ou Ferrol, con alcaldes ‘do cambio’: “¿ Onde están as súas grandes obras?, ¿En que melloraron a vida da xente? ¿Ou a política de igualdade, que nin sequera está nos seus discursos?”, preguntouse.