Actívase a campaña de Turismo Escolar 2016 da Deputación da Coruña

Cinco rutas para coñecer o patrimonio ao vivo, da pegada romana no Mandeo ás testemuñas de pedra no Castelo de Vimianzo, pasando polo achegamento á tradición da olería en Buño. Son algunhas das propostas do programa de turismo escolar que levará a nenos e nenas a destinos con historia.

En visitas guiadas, nenos e nenas de 4 a 16 anos serán os participantes na nova campaña de turismo escolar que bota a andar a área de Turismo da Deputación da Coruña co fin de achegarlles o valor cultural dos lugares patrimoniais máis importantes das súas comarcas.

As rutas propostas camiñan por algúns dos máis interesantes destinos para vivir a historia e coñecer o patrimonio máis próximo. En “Testemuñas de pedra” percorrerán o Pazo das Torres do Allo e o Castelo de Vimianzo, “Ritual e tradición”, nace coa idea de coñecer a tradición da olería no Ecomuseo Forno do Forte en Buño e a historia no Dolmen de Dombate, en Cabana de Bergantiños. De escolleren a ruta “Romanos no Mandeo” visitarán o Centro de Interpretación de Teixeiro (Curtis) coa súa dupla función, divulgativa, a través do centro de interpretación, e formativa, xa que o centro acolle cursos, obradoiros e serve como albergue. Por último, “O segredo do Eume”, ofrece rutas que atravesan o corazón das Fragas do Eume, e que permitirá aos pequenos descubrir a historia do Mosteiro de Caaveiro e “O bosque animado”, que percorre o Pazo de Mariñán e a Casa de Wenceslao Fernández Flórez autor da obra do mesmo nome localizada ao redor da súa casa, as portas do encoro de Cecebre.

As propostas están abertas a que cada centro de ensino introduza modificacións no itinerario e mesmo combine os máis apropiados para os seus intereses educativos.

Ademais destas rutas programadas, a Deputación da Coruña, en colaboración con diferentes concellos da provincia, pon a disposición dos centros de ensino outras propostas turísticas de interese patrimonial, cultural e lúdico nas diferentes comarcas da provincia da Coruña.