A Consellería de Cultura e Educación celebra o 5 de novembro “Un magosto de Medo” no Gaiás

A Consellería de Cultura, Educación e Ordenación Universitaria celebra o vindeiro 5 de novembro no Gaiás un magosto familiar cos contos da narradora Raquel Queizás.

A partir das 18 horas, o Museo Centro Gaiás acollerá ‘Un magosto de Medo’, no que os participantes aprenderán a elaborar o tradicional rosario de zonchos, o colar de castañas asadas típico do Día de Defuntos. E antes de comezar coa contada, nenos e maiores tiznarán a cara tal e como manda a tradición dos magostos.

Unha vez ambientados para a ocasión, a narradora Raquel Queizás descubriralles aos participantes contos tradicionais, lendas de cada recuncho do país, adaptacións de contos de autor e historias propias nas que todos serán protagonistas. O outono, o Samaín, a noite de Defuntos, a Santa Compaña ou os magostos centrarán esta contada de medo.

‘Un Magosto de Medo’ conta cun total de 200 prazas e para participar só é preciso inscribirse de balde en cidadedacultura.gal.