Unha muller foi trasladada ao Hospital Arquitecto Marcide tras unha explosión nun local en Mugardos

Unha muller de 60 anos cuxo nome responde ás iniciais M.L.L. foi trasladada este domingo ao Hospital Arquitecto Marcide tras rexistrarse unha explosión nun local no concello coruñés de Mugardos.

Segundo informa o 061, a alerta recibiuse sobre as 19,22 horas e foron enviadas ao punto dúas ambulancias asistenciais, unha medicalizada e persoal sanitario do PAC de Fene.

Foron atendidos dous pacientes, pero unha delas, outra muller, de 82 anos e con iniciais M.L.S., foi dada de alta no lugar dos feitos.

Pola súa banda, o 112 informa de que pai e filla resultaron feridos ao estalar diversas bombas de palenque que almacenaban nun alpendre situado a uns 10 metros da súa vivenda, na Avenida de Seixo, en Mugardos.

Segundo o centro de atención ás emerxencias, a explosión derrubou o alpendre na súa totalidade pero a vivenda non se viu afectada. Sobre as 19,30 horas, un particular avisou da explosión.

Pola súa banda, o 112 alertou a Urxencias Médicas, Bombeiros de Ferrol, forzas da orde e efectivos do GES Mugardos. Urxencias Médicas indicou que un dos feridos foi trasladado e o outro recibiu asistencia sanitaria no mesmo punto.