Shakespeare e Cervantes protagonizan unha “conversación imaxinaria” nos actos da USC con charlas e teatro

A Facultade de Filoloxía da Universidade de Santiago de Compostela (USC) programou un mes dedicado a Cervantes e Shakespeare durante outubro, con motivo dos 400 anos das súas mortes, onde establecerá unha “conversación imaxinaria” entre ambos os dous autores a través de diversas charlas, lecturas dramatizadas e representacións de danza e teatro.

En rolda de prensa en Santiago, o reitor da USC, Juan Viaño, presentou este completo programa cultural en compañía da decana de Filoloxía, María José López Couso, e a vicedecana, María do Cebreiro Rábade, nun acto no que agradeceu o traballo feito por parte desta facultade para conseguir unha serie de actividades que serán gratuítas e abertas a todo o mundo.

En palabras de María do Cebreiro Rábade, estas propostas establécense a xeito de “conversación imaxinaria” entre os autores do Quijote e Hamlet, como un “xogo” entre dous escritores que “son idénticos en xenialidade”, os cales compartiron un período “brillante e escuro ao mesmo tempo da cultura europea”.

Este “tanto monta, monta tanto” dos dous escritores obsérvase no propio cartel que anuncia as xornadas, no que se poden ver os rostros de Shakespeare e Cervantes como o seu reverso, pois “permiten que se lles dea a volta sen a perda de valor”.

Unha cuestión que explica estes autores sexan “clásicos e modernos” á vez, segundo expilca Rábade, porque “seguen estando vivos”, a través de todas as “adaptacións e versións” ás que as súas obras deron pé.

Por iso, non se ofrecerán só “lecturas académicas”, senón espectáculos de danza e teatrais co obxectivo de “establecer un diálogo” entre o mundo da universidade e a vida cultural da cidade.

PROGRAMA

O programa de actos arranca o 3 de outubro (12,00 horas, no Salón Nobre de Fonseca) coa conferencia do profesor da USC Luis Iglesias Feijoo titulada ‘A Quijote como libro’.

Entre os relatores en outubro estarán as cabezas visibles das academias galega e española de lingua, Xesús Alonso Montero (RAG) –coa conferencia ‘Quixotismo e palomequismo’– e Darío Villanueva (RAE) –conferencia titulada ‘O Quijote e o dinamismo das imaxes’ –. Outro dos pratos fortes será a charla do arqueólogo que exhumou os restos de Ricardo III, John Ashdown-Hill.

Así, haberá actividades como a ‘Impro Cervantes/Shakespeare’, da Aula de Danza da USC; un laboratorio de creación escénica da Compañía Nelson Quinteiro Cabaret, así como unha xornada dedicada aos grupos de investigación do Departamento de Lingua e Literatura Inglesas sobre a época de Shakespeare.

O peche da xornadas (27 de outubro) correrá a cargo do profesor Zenón Luis, da Universidade de Huelva, cunha charla acerca do Cardenio, o “misterioso vínculo” entre ambos os dous autores.

Xunto a isto, a decana de Filoloxía, María José López couso, informou de que ao longo dos meses de outubro e novembro a facultade tamén programa diversos simposios sobre as figuras de Quevedo, Ramón Llull, as Irmandades da Fala e Valle-Inclán. Para seguir as novidades deste centro activouse a conta @Cultura_FiloUSC.