Quedan libres tres membros da rede de roubo de coches de luxo

Tres membros da rede internacional que se dedicaba ao roubo de coches de luxo, que tiña base en Galicia e que quedou desarticulada na Operación Ligustro-Orso, pasaron este venres a disposición xudicial e quedaron en liberdade con obriga de comparecer ante o xulgado quincenalmente, investigados por roubo con forza, segundo informaron fontes do Tribunal Superior de Xustiza de Galicia (TSXG).

As mesmas fontes sinalaron que, á marxe destas tres persoas (dun total de 31 que foron detidas nas provincias de Pontevedra, Barcelona e Granada, e en Bélxica e Italia) non está previsto que pasen máis membros desta banda a disposición dos xulgados galegos. Así, o resto de detidos en Galicia, quedou libre en sede policial, á espera de ser reclamados polo xulgado de instrución número 7 de Vigo, que investiga estes feitos.

En esta operación policial, dirixida pola Unidade de Policía Xudicial da Comandancia de Garda Civil de Pontevedra e con cooperación das policías belga e italiana, foron arrestadas 31 persoas que, supostamente, se dedicaban ao roubo de vehículos de alta gama falsificando documentación para reclamar nos concesionarios duplicados de chaves deses coches, que previamente ‘seleccionaran’ na rúa.

Posteriormente, subtraían os coches e trasladábanos a cidades con portos marítimos para envialos ao continente africano. Para todo isto, utilizaban identidades falsas, empresas ficticias, abrían numerosas contas correntes, e cambiaban de domicilio constantemente para eludir a acción da Xustiza.

A Garda Civil atribúe a esta banda varios delitos: pertenza a organización criminal, falsificación de documentos, branqueo de capitais e receptación. Ademais das detencións, producíronse varios rexistros e interviñéronse 44 vehículos, diñeiro en efectivo, teléfonos, material informático, etc.