publicidade hoxe

O descenso do Eume en piragua cumpre cincuenta anos

PUBLICADO EN: Noticias de GaliciaDeportesDeportes PortadaPontedeume
A-
A+

O vindeiro sábado día 3 de setembro  ás 17:30 horas celébrase a 50º edición da “Baixada do Eume en piragua”. A competición organizada polo Club Náutico OFirrete vén celebrando de maneira interrompida desde o ano 1967. Este feito fai que esteamos ante unha das probas máis veteranas do calendario galego, tan só superada polo Descenso do Miño de Lugo e a Travesía de Foz.

A organización contará cuns invitados de luxo, como son a padeeira olímpica Teresa Portela que vén de competir nos seus quintos XXOO ocupando a sexta posición no K1 200 metros e tamén co medallista olímpico lucense Luís Gregorio Ramos Misioné. Ambos estarán na cerimonia de premios aos gañadores da regata. 

Nesta ocasión o río estará nunhas magníficas condicións para a baixada dos 360 padeeiros que participarán na proba. Endesa comprometeuse a que a central do Eume turbine uns 15 metros cúbicos de auga por segundo, para que o caudal do río sexa o idóneo e se poida ver un gran espectáculo. Os piragüistas poderán descender a gran velocidade demostrando a súa habilidade para manter o equilibrio e sortear os obstáculos naturais que presenta o percorrido.

Os afeccionados que se queiran achegar a ver a proba poderán gozar da habilidade dos corredores nas zonas de saída, así como nos numerosos rápidos que presenta o río. O rabión chamado “As Ferrerías” ou o coñecido como “O Cabalo” son os que maior afluencia de público teñen. O balizaxe dos últimos 500 metros fará que os piragüistas naveguen próximos ao paseo marítimo de Pontedeume, este tamén pode ser un bo enclave para ver a regata.

Os organizadores do evento lembran que  a estrada de acceso ao río Eume estará cortada no punto da “Alameda”, lugar onde terminan os rápidos. En devandito lugar habilitaranse aparcadoiros para que todas as persoas que o desexen deixen alí o seu coche e se dirixan andando a presenciar o descenso dos piragüistas nos tramos e rápidos máis comprometidos.

Lémbrase que todas aquelas persoas interesadas en ver a regata non esperen a última hora para subir ao río. Sendo a mellor opción subir pola mañá e pasar o día con familiares e amigos en “As Fragas do Eume”, un das contornas naturais de maior riqueza ecolóxica de Galicia.

1 de setembro de 2016 | 13:49 • Sen comentarios

Comentarios pechados.