Francisco Conde destaca aos xoves empresarios como motores da xeración de emprego

O conselleiro de Economía, Emprego e Industria, Francisco Conde, mantivo hoxe un encontro con membros das asociacións de xoves empresarios AJE Galicia e AJE Coruña, cos que avaliou os avances para eliminar as trabas burocráticas á posta en marcha de novas compañías. Conde destacou aos emprendedores de AJE como puntais de creación de empresas e motores da xeración de emprego, lembrando que a recuperación económica está a vir acompañada de mellores cifras na creación de novas compañías en todo o territorio galego.

Durante a reunión, Conde incidiu no traballo que está a realizar a Xunta para acabar cos trámites burocráticos innecesarios, eliminando a licencia municipal de apertura, ou poñendo en marcha a Oficina Doing Business, na que empresarios, emprendedores e profesionais poden denunciar trabas inxustificadas, e incluso propoñer cambios na lexislación. Conde apuntou que estas medidas van encamiñadas a mellorar a capacidade dos emprendedores para crear unha sociedade no menor tempo posible, un traballo que, lembrou, vén ademais acompañado dun permanente apoio no eido do financiamento, así como da creación dunha potente rede de aceleradoras, como Vía Galicia, xunto á Zona Franca; Agrobiotech; Galicia Open Future, xunto á Telefónica; os espazos de coworking xunto á EOI; e Connecting for Good Galicia, da man de Vodafone.

O conselleiro subliñou ademais o traballo que están a realizar os autónomos, que suman un de cada catro traballadores en Galicia, para consolidar a recuperación económica. Conde salientou que a Xunta incrementará o seu apoio a este colectivo, e alixerará as súas cargas sociais, ademais de facilitar os trámites administrativos que realizan, e impulsar a súa formación e a súa participación en proxectos de innovación de procesos e produtos.

“Os autónomos galegos deben responder ás demandas cada vez máis esixentes dos consumidores” e de aí a necesidade de acompañalos en procesos innovadores que melloren a súa competitividade, defendeu o conselleiro.