Dúas persoas feridas nunha colisión entre dous camións e un coche en Santiago

Dúas persoas resultaron feridas este mércores nunha colisión entre dous camións e un turismo, na N-550, a vía que une Santiago con Sigüeiro, en Oroso, á altura do cuartel da Garda Civil próximo a esta localidade.

Segundo informa o 112, un particular avisou sobre as 20,40 horas do accidente e o centro de atención ás emerxencias alertou a Urxencias Médicas, aos bombeiros compostelanos, a Protección Civil e á Garda Civil de Tráfico.

Os efectivos sanitarios trasladaron unha muller a un centro hospitalario e outra persoa recibiu asistencia médica no mesmo lugar dos feitos.

Ademais, os efectivos mobilizados encargáronse da limpeza dunha vertedura procedente dun dos vehículos e da retirada da cabeza tractora dun dos camións. A situación quedou normalizada sobre as 23,00 horas.