Desenfreo ‘punk’ no arranque do WOS Festival con The Oh Sees

Co ‘sold out’ dos californianos The Oh Sees arrancou este mércores en Santiago o WOS Festival, que se prolongará ata este domingo con citas do máis diverso e en diferentes espazos da capital galega.

No primeiro día de concertos -o martes xa houbo proxección en Numax-, The Oh Sees demostraron capacidade de convocatoria, tras o seu paso por o Primavera Sound e Paredes de Coura, entre moitos outros festivais.

Os de John Dwyer levaron o desenfreo á terraza da Fundación Granell, onde un público entregado saltou e bailou con temas do seu último álbum, ‘A Weird Exits’, como ‘Ticklish Warrior’ e ‘Plastic Pant’, pero tamén con outros anteriores como o ‘Contraption/Soul Desert’ do disco ‘Carrion Crawler/The Dream’ de 2011 co que rematou o recital.

Un recital de ‘punk’ con guitarras rabiosas e baterías frenéticas -dous membros da banda aos pratos- dun grupo o baixista do cal deixou moi claro sobre o escenario o seu espíruto, co lema ‘Trump is my sex slave’ estampado sobre a súa camiseta.

En resumo, un concerto que soubo a pouco e do que pouco se puido criticar. Dwyer concedeu unha primeira media hora insuperable, armado da súa guitarra a xeito de baioneta, ás veces, coma se dun violín se tratase, noutras.

Tras uns 20 minutos de relativo descanso nos que reinou a psicodelia co líder do grupo de costas e xogando co sintetizador viñeron outros 20 finais de descontrol, balbordo e distorsión: The Oh Sees deixan o listón ben alto para o resto de bandas e artistas que conforman o programa do WOS.