Concello de Santiago e Cogami traballarán para lograr unha accesibilidade universal na cidade

O alcalde de Santiago, Martiño Noriega, e o presidente de Cogami, Anxo Queiruga, asinaron este mércores un convenio de colaboración co ánimo de traballar “cóbado con cóbado” para lograr que na capital galega sexa posible unha “accesibilidade universal” que repercuta nunha mellor calidade de vida de todos os cidadáns.

En concreto, o acordo suporá que a asociación asesore o goberno municipal na elaboración de proxectos e, nun futuro, dun plan director orientado a favorecer a mobilidade na cidade.

Previamente, na semana europea da mobilidade, tanto Noriega e Queiruga como outros representantes do Concello -de todos os partidos políticos- e da vida social de Santiago -como o decano da facultade de medicina- fixeron un percorrido duns 500 metros en cadeira de rodas.

Dende a avenida Xoán XXIII ata a Casa do concello, nun traxecto duns 500 metros que tardaron en realizar uns tres cuartos de hora, os participantes na xornada puideron comprobar, en carne propia, as dificultades que supoñen as barreiras arquitectónicas para unha persoa con capacidade reducida.

De feito, Juan Gestal sufriu unha caída xusto en fronte da súa facultade, ás portas da Praza do Obradoiro. Outro dos momentos máis intensos viviuse cando os participantes tiveron que subir a rampla que dá acceso ao aparcamento subterráneo de Xoán XXIII. Neste punto, o rexedor chanceou mentres adiantaba a Gonzalo Muíños (do PSOE): “Isto é o sorpasso”, ha ironizado.

Queiruga explicoulles con anterioridade que esa costa, pola súa lonxitude, faría necesarias polo menos dúas paradas para que a suba se fixese máis levadeira.

COMPROMISO DO GOBERNO MUNICIPAL

Xa fronte á Catedral, en declaracións aos medios de comunicación, o concelleiro de Espazos Cidadáns, Jorge Duarte, mostrou o compromiso do goberno municipal por traballar en mellorar a accesibilidade, de modo que todos cidadáns, por igual, poidan moverse por Compostela.

Pola súa banda, Noriega recoñeceu que o pequeno traxecto foi “cansado” e con dificultades, ao igual que o resto de participantes, que apostaron por impulsar medidas para unha mellor mobilidade.

De feito, ao inicio do percorrido, un membro da xunta directiva de Cogami destacou que, aínda que hai algunhas cousas feitas, todas as cidades galegas merecen ao seu gusto “un suspenso”, xa que “sempre queda moito por facer” nesta materia.