Andreu Missé documenta a historia dun escándalo en ‘La gran estafa de las preferentes’

O xornalista Andreu Missé documenta a “historia dun escándalo”, o “drama” humano e a actitude “heroica” da xente que se botou ás rúas para esixir que lle devolvesen o seu diñeiro en ‘La gran estafa de las preferentes’.

Socio e director da revista Alternativas Económicas, o autor comentou este xoves en Santiago que o “engano masivo” da emisión de participacións preferentes e obrigas subordinadas en España lle impactou “dende o primeiro momento”.

Na presentación deste libro, que pretende “deixar constancia” do acontecido -algo polo que, polo menos en Galicia, non haberá responsables penais, en opinión do exfiscal superior de Galicia-, Missé advertiu de que esta investigación continuará, pola súa parte e pola dos seus compañeiros, e destacou que “hai que sacar moitas ensinanzas”.

Unha delas, segundo subliñou ante a presenza de afectados por este abuso do sistema bancario en Galicia, é o ser consciente de que se “a dignidade se levanta ante os poderosos” é posible que, aínda que sexa en parte, se faga xustiza.

REIVINDICACIÓN DO EXFISCAL SUPERIOR

Ao lado do xornalista estiveron Xesús Domínguez e Xulio Vicente, dous activistas que na comunidade galega deron a batalla, durante meses, ata lograr que, ben vía xudicial ou ben a través da arbitraxe, miles de galegos visen reintegrados os seus aforros, e tamén o deputado do BNG Francisco Jorquera e o exfiscal superior de Galicia, Carlos Varela.

Este último, que no seu día foi proactivo en defensa dos intereses dos clientes, na súa intervención chamou a atención, dende a perspectiva xurídica, sobre como Europa, a diferencia de Estados Unidos, carece de instrumentos “que permitan resolver estes abusos” de forma colectiva.

Neste sentido, Varela apuntou, como opción, á habilitación do Ministerio Fiscal para que en “estafas” como esta ou como a de Volkswagen sexa posible chegar a unha solución cunha “soa demanda, unha soa proba e unha soa sentenza”.

“HISTORIA DUN ESCÁNDALO”

Na historia deste “escándalo”, como o definiu o exfiscal superior, o xornalista Andreu Missé parte do “pecado orixinal” que supuxo, en 2003, “legalizar” dalgunha forma esta práctica, que dende 1998, segundo relatou, se levaba a cabo en paraísos fiscais.

Tras esta “amnistía”, en 2007-2008, chegou a crise, e “os bancos víronse con falta de capital”, segundo expuxo. “Ao non poder colocalo aos investidores -este produto-, colócano aos aforradores, coa agravante do engano na protección” que proporcionou o estado, segundo censurou.

Missé enumerou, unha a unha, as “infraccións” que encadeou a historia das preferentes, dende o feito de que as entidades financeiras se saltasen o test ao que debían someter aos usuarios, ata utilizar a Europa “como escusa fantástica” para todo. “E en 2011 descóbrese a fraude”, resaltou.

Aí empezou a mobilización, da que o xornalista eloxiou os seus participantes na comunidade galega, na súa maioría persoas maiores que se viron sen os aforros de toda unha vida, e cargou, neste extremo, contra o establecemento dunhas quitas para as que non había “soporte comunitario” e España foi “coelliño de indias”.

Por último, reprobou a arbitraxe que se favoreceu “para quitar presión” das protestas, posto que, segundo dixo, “non foi unha arbitraxe” nin foi “para todo o mundo”. A este respecto, recordou que foi unha empresa contratada polos bancos -PwC no caso das caixas galegas- a que “seleccionou os que recuperarían” o seu diñeiro.

“DEMOCRACIA ENFERMA”

Para Andreu Missé, tanto a “estafa” das preferentes como os desafiuzamentos dan a idea dunha democracia “enferma”, na que “o poder financeiro ten un poder desproporcionado”.

“E aquí non pasa nada, os órganos supervisores non teñen capacidade sancionadora”, lamentou, aínda aludindo á posibilidade de que, no caso de Bankia, si haxa responsables penais por estes feitos.

Desta forma resumiu o seu libro, que, segundo precisou, non está dirixido contra a banca senón “contra os abusos da banca”, entre os que inscribiu, tamén, as cláusulas chan e outras prácticas.