Sae a concurso a última fase de restauración da fachada do Obradoiro

A Fundación Catedral de Santiago, en aplicación e desenvolvemento do Convenio de colaboración subscrito entre a Xunta de Galicia; o Cabido da Catedral e a propia Fundación Catedral, sacou a concurso a última fase de restauración da fachada do Obradoiro por un orzamento duns 1,5 millóns de euros.

Segundo informa a Catedral de Santiago, trátase das obras de restauración completa da peita, castelletes, terraza e cripta do Obradoiro “coas que se remata a rehabilitación da emblemática e icónica fachada occidental da basílica compostelana”, segundo concreta.

O orzamento da citada intervención ascende a 1.555.471 euros, cun prazo de dezaseis meses para a súa realización, segundo puntualizou a Catedral compostelana.

No marco do convenio que destina 17 millóns de euros ás actuacións de conservación e restauración derivadas do Plan Director da Catedral de Santiago, executáronse obras no ámbito da Porta Santa e reconstrución do corpo alto da torre sur, practicamente culminada, segundo destaca a Catedral.

Ademais, recorda que están en fase de execución as correspondentes á restauración das torres –segunda fase–, traballos que se prolongarán por un período de dez meses. O importe de contrata destas tres intervencións ascende a 1.558.855 euros.

Neste momento, segundo sinala a Catedral de Santiago, trabállase na redacción do proxecto da rehabilitación das cubertas da capela maior e capelas absidiales e da restauración dos frescos da capela maior, para o cal en próximas datas instalaranse os medios auxiliares necesarios para a realización dos estudios previos.