Rescatan do tellado a un home por un incendio no baixo dunha casa en Santiago

Os Bombeiros de Santiago rescataron este xoves un home do tellado dunha casa debido a un incendio rexistrado no baixo da vivenda na que supostamente durmía o individuo.

Segundo informaron fontes dos Bombeiros de Santiago, pasadas as 4,30 horas saíron do parque cunha unidade de primeira intervención, formada por un vehículo autobomba e un autoescaleira, e co apoio doutro camión para surtir de auga.

O incendio rexistrouse nunha vivenda situada no número 5 da rúa Restollal, nunha casa antiga abandonada con baixo, primeira planta e buhardilla na capital galega.

Os bombeiros sinalaron que o lume afectou ao baixo, un cuarto de entre “40-50 metros cadrados” no que almacenara “moitos colchóns, neveiras, televisores, roupa”, entre outro material. Mentres, o fume afectou ao resto da vivenda.

Os bombeiros ao chegar atoparon un home de mediana idade, segundo explicaron, no tellado con problemas para baixar. “Estaba ben e pedía que lle baixasen”, relataron as mesmas fontes, que apuntaron a posibilidade de que se tratase dun sen teito que durmía na vivenda abandonada.

Unha vez rexistrada a vivenda e comprobado que non había ninguén máis no interior, os bombeiros procederon á extinción do incendio que les “levou tempo” debido á cantidade de obxectos almacenados. “Houbo que sacar o material”, destacaron, para engadir que “custou apagar todo aquilo”.

As mesmas fontes sinalaron que as vivendas lindantes non resultaron afectadas polo incendio e, tras concluír os labores, sobre as 7,00 horas regresaron ao parque.