Rescatan aos catro tripulantes dunha embarcación accidentada en Moaña
Catro persoas foron rescatadas durante a noite deste domingo na localidade pontevedresa de Moaña despois de sufrir un accidente coa embarcación na que viaxaban, que chocou contra unha batea.
Segundo a información da Central de Atención a Emerxencias 112-Galicia, o suceso ocorreu pasadas as 23,30 horas da noite, cando os tripulantes alertaron de que a embarcación quedara encaixada nunha batea.
Até o lugar desprazáronse efectivos do servizo de Gardacostas, a Garda Civil e Protección Civil. Salvamento Marítimo enviou á zona á Salvamar Mirach, que se encargou de rescatar aos catro tripulantes.