O novo comisario de Santiago fixa como retos a loita contra o terrorismo, a violencia de xénero e incendios

O novo comisario-xefe local de Santiago de Compostela, Félix García, fixouse entre os seus retos a loita contra o terrorismo, contra a violencia de xénero, contra os incendios e por seguir mantendo as baixas taxas de criminalidade que ten a cidade en comparación coa media.

Foi algunhas das metas que se marcou no seu discurso na súa presentación pública na comisaría compostelana, nun acto que contou co director xeral de Policía, Ignacio Cosidó; o delegado do Goberno en Galicia, Santiago Villanueva; o xefe da Policía de Galicia, Manuel Vázquez López, e o alcalde da cidade, Martiño Noriega.

“Espero non defraudar”, dixo, ante a presenza tamén do seu antecesor no cargo, Simón Sabariz, ao que todos os intervinientes felicitaron por deixar o listón “tan alto”.

Félix García, que á fronte da xefatura de sección da Udyco lideró actividades contra o narcotráfico, destacou na súa intervención a “especial atención” que no seu novo posto prestará ao terrorismo, “tratando de evitar que calquera atentado afecte” á capital galega.

“NINGUNHA PISTA” SOBRE UNHA AMEAZA REAL

A continuación, preguntado polos xornalistas por este extremo, afirmou que “de momento non se ten ningún coñecemento” que apunte a unha ameaza real, pero recoñeceu que “é algo que non se pode descartar nunca”.

“Temos que estar previdos”, resaltou, antes de indicar que para iso se realizan controis en aeroportos e estacións, aínda que, segundo insistiu, “non se ten ningunha información de momento que dea unha pista sobre ese tema”. Pero “hai que previlo” e “por iso están a tomar todas as medidas”, resolveu.

Ante os membros da comisaría, García recordou a súa traxectoria para subliñar a importancia do “rexeitamento social” na loita contra actividades delituosas: na súa anterior etapa contra o narcotráfico e na actual, contra os lumes no monte da comunidade.

Ademais, apelou á colaboración co resto de corpos de seguridade e finalizou sinalando o obxectivo de lograr “a seguridade de todo o mundo, dos peregrinos” e dos veciños santiagueses, nunha das comunidades “máis seguras”, como é Galicia.

IGNACIO COSIDÓ

Previamente tomou a palabra o director xeral de Policía, Ignacio Cosidó, quen xustificou a súa presenza por que a seguridade é “especialmente importante” para a Policía Nacional nun lugar como Compostela, capital galega e onde culmina o Camiño de Santiago.

Tivo palabras Cosidó para o anterior comisario, “magnífico, e para “tódolos policías” da xefatura, aos que fixo un recoñecemento.

Así mesmo, recordou o “accidente tan terrible” que hai tres anos se produciu no barrio santiagués de Angrois, onde descarrilou un tren Alvia ocasionando 80 mortes e máis de 100 feridos. ÁS vítimas, pero tamén a que deron “auxilio humanitario” aqueles días, trasladounos “novamente” a homenaxe da Policía.

Dos axentes, en concreto, dixo que “deron un exemplo de entrega, servizo e sacrificio”, para a continuación admitir que “non se fixo o recoñecemento a todos e todo” o que sería ao seu xuízo necesario.

DELEGADO DO GOBERNO

Por último, o delegado do Goberno en Galicia, Santiago Villanueva, valorou que o destino ao que chega Félix García, este “galego por adopción”, “é complicado”, pero augurou que “o”vai facer moi ben”.

Así, desexoulle “que siga coa liña do anterior comisario e agradeceu a Cosidó o seu “compromiso con Galicia”, antes de reiterar que cre que os resultados de García serán tamén bos.