O candidato do PSdeG á Xunta espera unha etapa de menos ruído en política nacional

O candidato do PSdeG-PSOE á presidencia da Xunta de Galicia, Xoaquín Fernández Leiceaga, expresou este martes o seu desexo de que a política nacional entre “nunha etapa de menos ruído” para que os esforzos dos partidos se centren en “desenvolver unha axenda propia de Galicia” durante a campaña das autonómicas.

Así o expresou nun acto sobre política industrial, antes de manter unha reunión con dirección e empregados do estaleiro vigués Vulcano. A ese respecto, afirmou que “os problemas de Galicia son de tal envergadura que merecen unha discusión profunda” entre os partidos”. “Os cidadáns merecen que discutamos dos seus problemas, agora toca campaña galega, toca discutir dos problemas de Galicia”, apostilou.

O candidato socialista proclamou que a súa formación ten “unha proposta firme” para “reverter as políticas de recortes e o fracaso da política industrial” da actual Xunta. “Iso ben merece que lle dediquemos o próximo mes”, sentenciou.

Con respecto ás polémicas internas, e ao malestar que o alcalde Abel Caballero trasladou ao Comité Federal polos cambios na candidatura de Pontevedra, Fernández Leiceaga limitouse a sinalar que os socialistas teñen por diante “unha tarefa de enorme transcendencia”, que é “derrotar a Feijóo e construír unha alternativa de progreso e modernización”. “A iso dedicarei todas as miñas forzas e desveos, iso é o que me preocupa”, subliñou.