Medio Rural informa do control dos incendios de Rianxo e San Cristovo de Cea

A Consellería do Medio Rural dá por controlado o incendio forestal rexistrado na localidade coruñesa de Rianxo, a mesma situación na que se atopa desde o martes o lume de San Cristovo de Cea (Ourense).

Segundo os datos achegados pola Xunta a través dun comunicado, o incendio forestal que comezou sobre as 15,26 horas deste martes na parroquia de Leiro, en Rianxo, quedou controlado ás 20,15 horas.

As primeiras estimacións indican que o lume calcinou unhas 27 hectáreas de arboledo. Na súa extinción traballan un técnico, oito axentes, 21 brigadas, 13 motobombas, 3 pas, 11 helicópteros e tres avións.

Por outra banda, permanece controlado desde a mañá deste martes o incendio forestal rexistrado desde o domingo na parroquia de Oseira, en San Cristovo de Cea, e que queimou unhas 170 hectáreas.

Na extinción deste lume traballan dous técnicos, 19 axentes, 58 brigadas, 22 motobombas, tres pas, seis helicópteros e tres avións.