Feijóo avanza unha achega de 600.000 euros para repoñer os danos pola sarabia nos viñedos da Ribeira Sacra

Logo de avaliar os danos rexistrados pola sarabia nos viñedos da Ribeira Sacra o pasado 15 de agosto, e dada a situación excepcional, o presidente do Goberno galego, Alberto Núñez Feijóo, avanzou hoxe tras a reunión do Consello unha partida de preto de 700.000 euros para compensar a perda da produción e arranxar diversas infraestruturas relacionadas co cultivo da vide que se viron afectadas.

Máis polo miúdo, Feijóo precisou que o Goberno galego habilitará unha orde específica parar compensar a perda da produción cunha liña de axudas de 500.000 euros, da que se poderán beneficiar aqueles viticultores que non tiveran subscrito ningunha póliza de seguros, sendo a achega máxima por viticultor de 15.000 euros.

Así mesmo, destinaranse preto de 100.000 euros para arranxar camiños, muros e outras infraestruturas relacionadas co cultivo da vide que se viron afectadas por este fenómeno atmosférico adverso.

O titular da Xunta avogou por afrontar coa máxima celeridade os danos para que os produtores afectados podan continuar coa actividade o antes posible. E recordou que a treboada de pedrazo afectou aos viñedos da Denominación de Orixe Ribeira Sacra, maioritariamente no concello lugués de Sober e nunha parte do de Monforte de Lemos, concretamente, na subzona de Amandi, tradicionalmente unha das máis coñecidas da Ribeira Sacra.

Neste sentido, subliñou que os primeiros cálculos indican que a área máis damnificada abarca arredor de 70 hectáreas, que foron practicamente arrasadas pola sarabia caída, afectando a uns 400.000 quilos de uva, segundo as primeiras estimacións, e cunhas perdas directas avaliadas duns 500.000 euros.

“O que fixemos, polo tanto, foi unha avaliación inmediata da situación; trasladamos ao Goberno central a solicitude de declaración de zona afectada por emerxencias; solicitamos ao Ministerio de Facenda a redución dos módulos de estimación obxectiva para as explotacións das zonas que se viron afectadas; urxiuse a intervención do Agroseguro para aquelas persoas que si teñen póliza e levouse a cabo unha avaliación técnica para incluír a zona afectada nas axudas de restruturación e reconversión de viñedos”, abundou o presidente da Xunta, logo de precisar que, neste momento, hai 289 propietarios afectados.