Covadonga Toca participa na clausura do Programa Integrado de Emprego Ourense

Covadonga Toca na clausura do programa

A secretaria xeral de Emprego, Covadonga Toca, participou hoxe na clausura e entrega de diplomas do Programa Integrado de Emprego Ourense Innovación, que apoia a Xunta e a través do cal 70 alumnos e alumnas recibiron formación en diferentes especialidades.

Covadonga Toca explicou que esta iniciativa, ademais de ofrecer unha cualificación adaptada á demanda do mercado laboral, achegou aos seus participantes a oportunidade de acceder a un emprego. Un total de 70 persoas desempregadas e inscritas como demandantes nas oficinas de emprego da cidade de Ourense, con especial atención a colectivos como persoas en risco de exclusión, con discapacidade, menores de 30 anos e mulleres, participaron no Programa Integrado Ourense Innovación. En concreto, impartíronse catro cursos nos sectores de comercio (marketing e publicidade), servizos (azafato e relacións públicas), vixilante de seguridade e hostalaría (cociña creativa, gastronomía e pastelería).

A secretaria xeral de Emprego puxo en valor a importancia da cooperación entre a Administración autonómica e os concellos para o desenvolvemento destes plans, aos que se suman os obradoiros de emprego, centrados na realización de obras ou na prestación de servizos de interese xeral e social. Cada obradoiro ten unha duración de 6 meses e alterna formación e práctica profesional co obxectivo de mellorar a aprendizaxe, a cualificación e adquisición de experiencia profesional, ao tempo que fomenta o emprendemento.

Covadonga Toca apuntou, por último, que tanto os programas integrados como os obradoiros forman parte da Axenda 20 para o Emprego, a folla de ruta a través da que en Galicia se impulsa a formación, capacitación e especialización.