Carmela Silva felicita a Teresa Portela polo seu diploma olímpico en Río’16

A Presidenta da Deputación de Pontevedra felicitou esta mañá telefonicamente a Teresa Portela polo seu diploma olímpico en Río`16 e lle transmitiu “o orgullo que supón para todas e todos os pontevedreses, galegos e españois”.

Carmela Silva destacou sobre Portela o papel que desempeña “para dar visibilidade ás mulleres, para demostrar que as mulleres podemos competir nos Xogos Olímpicos nunha disciplina aínda tan asociada socialmente ós homes como é o piragüismo”. Ademais, Carmela Silva enxalzou o “mérito de Teresa Portela: muller, deportista, olímpica, mestra, fisioterapeuta e nai, un verdadeiro exemplo para a toda a sociedade”.

Nas Olimpiadas de Río, a piragüista do Morrazo obtivo onte a sexta posición na final de K1- 200 metros tras acadar o terceiro mellor tempo na seminifinal do pasado luns na lagoa Rodrigo de Freitas.

Teresa Portela, natural de Cangas do Morrazo, é unha das deportistas máis importantes do panorama internacional, en concreto, na modalidade de piragüismo en augas tranquilas e a terceira muller en disputar cinco Xogos Olímpicos na historia do olimpismo español. Entre os seus trunfos destacan as 14 medallas no Campionato Mundial de Piragüismo, as 17 no europeo, a súa participación en cinco xogos olímpicos, o seu cuarto posto nas Olimpiadas de Londres 2012 e os seus 5 diplomas olímpicos.