Un afectado por inhalación de monóxido de carbono en Cervantes

Un veciño da localidade lucense de Cervantes tivo que ser evacuado de urxencia a última hora do mércores por mor dunha intoxicación por monóxido de carbono. Segundo os datos do CAE 112-Galicia, o home, duns 60 anos, foi localizado inconsciente no interior do seu domicilio, no lugar de Cela, ao redor das 20,00 horas.

Até o lugar desprazáronse os Bombeiros de Sarria, a Garda Civil e o helicóptero medicalizado do 061 con base en Ourense, que trasladou ao home a un centro médico. Os servizos de emerxencias indicaron que a orixe da intoxicación puido estar nun xerador de enerxía a gasóleo.