Preséntase o XV Campionato do Mundo de Pesca a Mosca Xuventude

Lete Lasa na presentación do evento deportivo

O secretario xeral para o Deporte, José Ramón Lete Lasa, presentou esta maña o Campionato do Mundo de Pesca a Mosca Xuventude. No curso da presentación, Lete Lasa puxo en valor como “ao indubidable valor deportivo e competitivo da proba, súmase que este campionato será tamén unha excelente ocasión de volver a mostrarnos ao mundo a través do deporte,e dos nosos ríos e os seus recursos”.

Galicia acollerá do 8 ao 14 de agosto o Campionato do Mundo de Pesca a Mosca Xuventude, que terá varios escenarios distribuídos por toda a comunidade nos ríos Xallas, Mandeo, Eume, Anllóns e encoro de Vilasenín, en Ordes, mentres o río Ulla acollerá unha zona de adestramentos do mesmo xeito que o coto de Santa Comba, todos eles magníficos escenarios de pesca onde os mellores pescadores xuvenís do mundo da sedela pesada deberán demostrar as súas habilidades coa cana.

O combinado español estará formado polos pescadores, Álvaro Fernández Alanzor (Andalucía), Aritz Aguayo Pradas (Cataluña), Carlos Delgado Campos (Estremadura), Felipe de Mingo Prieto (Valencia), Julen Gabilondo Martín (País Vasco), Marcos Gayoso Varela (Galicia), estando aínda por decidir os nomes do capitán e do delegado do equipo. Xunto a este equipo participarán tamén representantes da República Checa, Francia, Polonia, EEUU, Sudáfrica, Eslovaquia, Irlanda e Eslovenia.

É a primeira vez que o campionato se celebra en España, indicou o presidente da Federación Galega de Pesca, José Manuel Rey Alvela e a cerimonia de apertura está prevista para o próximo día 8 de agosto na Praza do Obradoiro e a ceremonia de clausura terá lugar no Ézaro o día 13 de agosto.