Enviar a un amigo
Opinar
ImprimirOs cursos de verán de lingua e cultura galegas despiden a vixésimo novena edición
Os Cursos de verán lingua e cultura galegas –que coorganiza a Secretaría Xeral de Política Lingüística en colaboración co Instituto da Lingua Galega (ILG) da Universidade de Santiago de Compostela (USC) e mais coa Real Academia Galega (RAG)– despediron hoxe a súa vixésimo novena edición cun acto de clausura no que o secretario xeral de Cultura, Anxo Lorenzo, lles agradeceu aos máis de 60 alumnos e alumnas o seu interese por Galicia e o seu labor de “embaixadores” da súa riqueza cultural e lingüística nos seus respectivos países.
“Galicia recibiu moito de vós durante estas tres semanas”, afirmou Anxo Lorenzo. “A cultura e a lingua galegas precisan contar coas vosas voces e coas vosas perspectivas diversas”, dixo, ao tempo que lles expresou o seu desexo de que lle dean continuidade ao seu labor de “estudo e de contribución ao galego” desde os seus respectivos ámbitos. Nese sentido, salientou que “aplaudiremos e saudaremos con entusiasmo as contribucións dirixidas a darlle pulo á nosa lingua vindas desde calquera parte do mundo”.
En representación das entidades promotoras dos cursos tamén interviron no acto de clausura Roberto Javier López, vicerreitor de Oferta Docente e Innovación Educativa da USC; Ernesto González Seoane, director do ILG; e Henrique Monteagudo, secretario da RAG, que lles fixo entrega dos diplomas acreditativos aos alumnos e alumnas, xunto cos profesores Xosé Luís Regueira e Ana Boullón.
Formación e programación cultural
Nesta XXIX edición dos cursos participaron máis de 60 alumnos e alumnas procedentes de de diferentes países de Europa, América e África, como Alemaña, Polonia, Italia, Portugal, Rusia, Hungría, Suíza, Gran Bretaña, Finlandia, Irlanda, Brasil, EEUU, Arxentina, Chile, India, Singapur e Xapón, así como de diferentes puntos de España.
Desde o pasado 1 de xullo, o alumando asistiu a clases teóricas e prácticas de lingua, literatura e lingüística, así como a conferencias e encontros con persoeiros destacados da cultura galega.
